O'yin haqida

- So'zni Birodar Abduraimovni 80 yillik yubileylari bilan tabriklashdan boshlamoqchiman. Ushbu tadbirda qatnasha olmadim. Birodar Abduraimov o'z davrida o'zbek futboli afsonalaridan biri bo'lgan. Alloh bergan umrni xalqning ardog'ida o'tkazishlarini tilab qolaman. O'yinga kelsak, ikki xil bo'lim. "Anjidon"ga qarshi kuchli tayyorgarlik olib borgandik. Sababi, ular zich himoyalanadi va ikkinchi raqamda o'ynaydi. Birinchi bo'limda ayb o'zimizda bo'ldi. Oddiy to'p uzatmasida xatolarga yo'l qo'ydik. Deyarli hamma bu xatoni qildi. Kiyinish xonasida ham bu narsani aytib o'tdim. Shu narsani ikkinchi bo'limda o'zgartirdik. Xomyakovni bilaman, uning jamoalari juda tartibli himoyalanadi. Uning jamoasi har safar juda intizom bilan o'ynaydi. Bu kabi jamoalarga qarshi o'ynash juda og'ir. Lekin, baribir g'alaba qozona oldik. Bu o'yinda mag'lub bo'lishimiz ham mumkin edi, chunki hujumga o'tkanimizda baribir bo'shliqlar paydo bo'ladi. Bugun shunday imkoniyatlardan raqib foydalana olmadi.

- "Andijon" zich himoyalanadi. Lekin, birinchi bo'limda "Andijon"da vaziyatlar ko'p bo'ldi va o'yinni nazorat qilishga urindi. Bu sizga kutilmagan holat bo'lmadimi?

- Boya aytib o'tdim. Oddiy vaziyatdan gol o'tkazdik. Aytganimdek, agar har bir futbolchi ikki martadan ham to'p yo'qotsa, bu 20 ta vaziyat degani. Albatta, bunday holatda raqibda imkoniyat bo'ladi. Ko'rgan bo'lsangiz, goldan keyin boshqacha harakatlandik. Yana gol kiritdik, ammo ofsayd edi. Aynan shunday harakatlanishni o'yin boshidan boshlash kerak edi.

- Anzur Ismoilov birinchi va ikkinchi bo'limda qanday funkciyani bajardi? Biz uning hujumga qo'shilganini ko'rdik...

- Ular bir birlarini to'ldirishadi. Raqib ikkinchi raqamda o'ynadi. Himoyani yorib o'tish qiyin bo'ldi. Shu sabab ham ikkinchi hujumchini maydonga tushirdim. Menimcha, bu o'zini oqladi. 0:1 yoki 0:2 farqi deyarli yo'q.

- Ikki yil oldin Olmaliqdagi o'yinda 0:2 hisobida yutkazayotgan OKMK, yakunda 3:2 hisobda g'alaba qozongan. O'shanda ham Boake o'yin taqdirini hal qilgan. Bugun ham shunday bo'ldi. O'yin oldidan Boakega qandaydir ko'rsatma berganmidingiz?

- Yo'q, u o'z ishini qilmoqda. O'yindan oldin hammaga birdek ko'rsatma berilgan. Raqib juda zich himoyalangani uchun uzun uzatmalar bilan harakat qildik. Hujumchi o'z joyida, o'z ishini qilishi kerak. U hujumchi bo'lgandan keyin gol urishi lozim. Bu erda boshqa narsa yo'q.

Mirjalol Qosimov: "Raqib imkoniyatlaridan foydalanganda, bugun mag'lub bo'lishimiz ham mumkin edi"