Uchrashuv 0:0 hisobida yakunlandi. O'yindan keyin termizliklar hujumchisi Murod Bobojonov fikrlariga quloq tutdik.

“Avvalambor hammani yangi mavsum boshlangani bilan tabriklayman. “Olimpik” bilan bahs juda ham qiziqarli kechdi. Ikki jamoada ham gol urish uchun imkoniyatlar yuzaga keldi. Ammo, mavsumning birinchi o'yini bo'lgani bois, baribir kamchiliklar kuzatildi. O'ylashimcha, joriy mavsum juda qiziqarli kechadi.

G'alaba qozonishimizga omad etishmadi. Bizda gol urish uchun qulay imkoniyatlar paydo bo'ldi. Ammo, aniq zarbani berish vaqtida ozgina sovuqqonlik etishmadi. Albatta, bu futbol, shunaqa holatlari bilan qiziqarli kechadi. “Olimpik” bilan bahsda yo'l qo'yilgan xatolardan to'g'ri xulosalar chiqargan holda keyingi o'yinlarga tayyorgarlik ko'ramiz. O'ylaymanki, g'alabali o'yinlarimiz oldinda.

Ispaniyalik murabbiylar menda yomon taassurot qoldirgani yo'q. Yaqinda ish boshlagan bo'lsa-da, muhitga juda tez kirishib ketdi. Mashg'ulotlarimiz ham ko'tarinka kayfiyatda o'tkazilmoqda. Bu murabbiylar bilan yaxshi natijalar ko'rsata olamiz. G'alabali o'yinlarimiz hali oldinda deya olaman”.

Murod Bobojonov: “G'alaba qozonishimizga omad etishmadi”