"Kubok uchrashuvlari chempionatga qaraganda doim boshqacha bo'ladi. Qisqa vaqt oralig'ida shunday o'yinlar ko'p o'tmoqda. G'alabadan albatta xursandmiz. Chunki 5ta o'yindan beri yuta olmayotgan edik. O'ziga hos yoqimli holat. G'alaba bilan barchani tabriklayman. Guruh bosqichida bitta o'yinimiz qoldi. Samarqandda g'alaba qozonish orqali keyingi bosqichga chiqish imkoniga ega bo'lamiz"- deydi Murod Otajonov.

- "Bunyodkor"da kim murabbiy bo'lsa ham doim chiroyli o'yinini yo'qotmagan. Shu narsa jamoaning qonida bor. Lekin bu yil "Bunyodkor" o'yin jozibasini yo'qotgandek ko'rinmoqda. Bunga sabab nima?

- Bo'lishi mumkin. Tashqaridan sizlarga boshqacha ko'rinishi tabiiy. Xabaringiz bor, jamoada har yili o'zgarishlar bo'lyapti. Bitta tarkib saqlanib qolinmayapti. Kombinacion o'ynashga harakat qilyapmiz. Ikkinchi tomondan natija ham kerak. Hech kim chiroyli o'ynaganimizni gapirmaydi. Yuta olmasak, nega g'alabalar bo'lmayapti, deyishadi. Chiroyli o'ynab g'alaba qozonsak ikki karra xursand bo'lamiz. Kimdir chiroyli o'yin ko'rsatib natijaga erishadi, yana kimdir natijaga o'ynaydi.

- Yosh debyutantlar Narimon Ahmadjonov va Ulug'bek Kenjaevning debyut uchrashuvi qanday taassurot qoldirdi?

- Ular doim nazoratimizda. O'zini ko'rsatganlarni sekin-asta asosiy tarkibga jalb qilib boramiz. Kelajak yoshlarni qo'lida. Ular allaqachon o'ynashi kerak.

- Yana bir yosh futbolchi Abdulloh Omonaliev o'tgan yili ikkinchi davrada maydonga tushib turgandi. Bu yil umuman ko'rinmay qoldi?

- Bu savolni unga berishingiz kerak. Bilmadim, bizda ham futbolchiga savollarimiz ko'p. Kim yaxshi bo'lsa, imkoniyat berishga tayyormiz. Hech kim ertaga maydonga tushishi kafolatlanmagan.

Murod Otajonov: "Hech kim chiroyli o'ynaganimizni gapirmaydi. Natija ham kerak"