Ikkinchi jahon urushida o'zining navqiron yoshligini jangohlarda, urush olovlarida o'tkazgan bobolarimizning, u erlarda jonini fido qilgan qahramonlarimizning xotirasini hurmat qilish – biz avlodlarning burchimizdir.

Shuningdek urush ortida kechani kecha demay, kunduzni kunduz demay, och-nahor tinmasdan mehnat qilgan bobolarimiz va momolarimizning jasorati va qahramonligi doimo xotirimizda. Hozirgi paytda mustaqil Vatanimizda qarilik gashtini so'rayotgan bunday hurmatli insonlarni qadrlash esa, insoniylik burchimizdir.

9-may xotira va qadrlash kuni munosabati bilan “Nasaf” PFK rahbariyati tashabbusiga ko'ra, shunday insonlarni yo'qlash, ularga hurmat bajo keltirish, qadrlash ananaga aylanib qolgan.

Bugun “Nasaf” PFK vakillari va bir guruh futbolchilar, Qarshi shahrida istiqomat qilayotgan va ikkinchi jahon urushi qatnashchilari xonadoniga tashrif buyurishib, ularga chuqur hurmat bajo keltiriishdi.

Shunday qadrli insonlarimizdan biri - Rashid bobo Umarovdir. U kishi ikkinchi jahon urushini Pragada nihoyalab, o'z ona yurtiga qaytib kelganlar. Hozirgi paytda mustaqil yurtimizda qarilik gashtini surmoqdalar. Vakillarimiz u kishiga chuqur hurmat bajo keltirishdi va sovg'a-salomlar topshirishdi.

"Nasaf": Qadrli insonlarimiz ezozlandi