Navbahor o'yingohining anjumanlar zalida bo'lib o'tgan tadbirda Namangan viloyati rahbarlari, shahar, tuman hokimlari, jamoa homiylari, viloyat futbol federaciyasi, Navbahor futbol klubi rahbarlari, Navbahor murabbiylar shtabi, jamoa azolari, OAV vakillari va bir guruh muxlislar ishtirok etishdi.

O'tgan mavsum yakuniga ko'ra tarkib o'zagi saqlab qolingani bois murabbiylar shtabi qishki yig'in chog'ida chiziqlarni yanada kuchaytirish maqsadida bir qator futbolchilarni ko'rikdan o'tkazishdi. Yakunda taklif etilganlarning sakkiz nafari bilan shartnoma imzolashga qaror qilindi. Taqdimot marosimida bu yildan Navbahor azosiga aylangan futbolchilarga jamoa liboslari topshirildi.

Taqdimot marosimini Namangan viloyat futbol federaciyasi birinchi vice-prezidenti Bahromjon Xolmirzaev ochib, yig'ilganlarni yaqinlashib kelayotgan futbol bayrami bilan qutlab, so'zni Namangan viloyat hokimi, viloyat futbol federaciyasi prezidenti Bahodir Yusupovga berdi. Viloyatimiz rahbari ham barchani yaqinlashib kelayotgan futbol va bahor bayrami bilan barchani muborakbod etdi.

Shu bilan birgalikda, Navbahor jamoasi futbolchilaridan yangi mavsumda muxlislarni yanada xursand qilish uchun bor kuch va mahoratlarini ishga solishlarini takidlab o'tdi.

Shundan so'ng mavsumlar oralig'ida Navbahor azosiga aylangan futbolchilarga jamoa liboslari tantanali ravishda topshirildi. Futbolchilarga jamoa liboslarini viloyat hokimi Bahodir Yusupov topshirdi. Unga ko'ra Jizzaxning So'g'diyona jamoasidan taklif etilgan darvozabon Aleksandr Melenchuk 1, Olmaliq klubidan chaqirilgan Timur Kagirov 4, Metallurgdan jalb etilgan Sunnatilla Mamadaliev 6, Dinamodan taklif etilgan Sanat Shixov 7, Bobojonov Azamat 17, Mashaldan chaqirilgan Muydin Mamazulumovlarga 25-raqamli futbolkalar topshirildi.

Yangi mavsumda Navbahor sharafini himoya qiladigan yana bir yangi futbolchi Ulug'bek Baqoev oilaviy sabablarga Buxoroga jo'nab ketganligi sababli taqdimot marosimida qatnasha olmadi.

Futbolchilarga futbolkalar topshirib bo'lingach, Navbahor futbol klubi rahbarlari viloyat hokimi Bahodir Yusupovga 50-raqamli futbolka va klub tomonidan tayyorgarlan maxsus sovg'alar topshirildi. Navbahor futbol klubi prezidenti To'lqin Dadaboevga esa 30-raqamli futbolka va sovg'a topshirildi. Shuningdek, klub tomonidan tayyorlangan va klub ramzi tushirilgan maxsus sovg'alar shahar, tuman hokimlari va jamoa homiy tashkilot rahbarlariga ham topshirildi. hokimlar va homiy tashkilot rahbarlarining familyasi yozilgan maxsus futbolkalarni tantanali ravishda topshirilishi esa yig'ilganlarni kayfiyatini ko'tarib, taqdimot marosimiga o'zgacha shuhk qo'shdi.

Taqdimot marosimi so'nggida, jamoa sardori Dilshod Jabborov va etakchi o'yinchilardan biri Ilhom Boydedaevlar so'zga chiqib, rahbariyat tomonidan bildirilgan ishonch va etibor uchun minnatdorchilik bildirib, mavsum davomida namanganlik muxlislarni chiroyli o'yinlar va g'alabalar bilan xursand qilishga vada berishdi.

Yangi futbolchilarni tanishtiruv marosimida Navbahor futbol klubi rahbariyati, murabbiylar shtabi va jamoa azolari Asror tekstil korxonasining D.Maretti kostyum shimlari bilan taminlaganligi uchun futbol klubi rahbariyati tomonidan minnatdorchilik bildirildi. o'z navbatida korxona rahbariga viloyat hokimi B.Yusupov futbol klubi tomonidan tasis etilgan sovg'a topshirdi.
Taqdimot marosimi yakuniga etgach, Navbahor futbol klubi vice-prezidenti Rasuljon Nizambaev va jamoa bosh murabbiyi Baxtiyor Ashurmatov va Navbahor muxlislari ishtirokida uchrashuv bo'lib o'tdi. Uchrashuv chog'ida jamoa ishqibozlari o'zlarini qiziqtirgan savollariga javob olishdi.

foto: Sherzod Hamdamov

"Navbahor" yangi futbolchilarni tanishtirdi FOTOGALEREYA