1/8 final natijalariga ko'ra, "Shanxay SIPG" (Xitoy), "Urava Reds" (Yaponiya), "Guangju Evergrand" (Xitoy) va "Kashima Antlers" (Yaponiya) jamoalari chorak finalda o'ynaydigan bo'lishdi. G'ar mintaqasi klublari esa avgust oyida 1\8 final uchrashuvlarini o'tkazishadi.

1/8 final juftliklari:

"Al Nasr" (Saudiya Arabistoni) - "Al Vahda" (BAA)

"Al Ittihod" (Saudiya Arabistoni) - "Zobahan" (Eron)

"Al Duhayl" (Qatar) - "Al Sadd" (Qatar)

"Al Ahli" (Saudiya Arabistoni) - "Al Hilol" (Saudiya Arabistoni)

Dastlabki uchrashuvlar 5-6 avgust, javob bahslari esa 12-13 avgustda bo'lib o'tadi.

Hozirda barcha 8ta jamoa bo'lajak bellashuvlarga tayyorgarlikni boshlab yuborgan. Xususan Saudiya Arabistonining ikki klubi "Al Hilol" bilan "Al Ittihod" o'z rejalarini malum qildi. Unga ko'ra, "Al Hilol" yangi mavsumga hozirlikni Avstriyada o'tkazadi. Malumki, ushbu jamoaga yaqinda bosh murabbiy etib Rezvan Luchesku tayinlandi. Yangi murabbiy jamoani Avstriyaning Lienc shahriga olib borishni maqul ko'rdi. "Al Hilol" bu erda uch hafta mobaynida mashg'ulot o'tkazadi.

"Al Ittihod" yozgi yig'inni Angliyaning Manchester shahrida o'tkazmoqda. Xose Luis Sierra shogirdlari Eronning "Zobahan" klubi bilan bo'ladigan o'yinga tayyorgarlikni mana shu erda olib borishadi. Malumki, "Al Ittihod" bu yilgi OCHLda "Lokomotiv" bilan bitta guruhda kurash olib bordi va guruhda "Al Vahda"dan so'ng ikkinchi o'rinni egalladi. Jiddaliklar Manchesterga ketishdan oldin o'z saflariga Abdulloh Al Malki, Hamdan Al Shammari, Abdulrahmon Al Obud kabi futbolchilarni qo'shib olishdi.

"Lokomotiv"ning OCHLdagi yana bir guruhdoshi "Al Vahda" Gollandiya variantini maqul qo'ldi. Jamoa u erda 25 iyundan beri mashg'ulot o'tkazyapti. Ikki hafta oldin klubda bosh murabbiy o'zgardi: Xenk Ten Kate jamoani tark etib, o'rniga Maurise Steyn tayinlandi. Xenk Ten Katening klubdan ketishiga sabab "Al Vahda"ning ichki chempionatda 3-o'rinni egallagani bo'ldi. Bu jamoa OCHL 1/8 finalida Saudiya Arabistonining "Al Nasr" klubiga qarshi bahs olib boradi.

Evropada yig'in o'tkazayotgan yana bir jamoa bu Qatarning "Al Duhayl" klubi. "Al Duhayl" Portugaliyaning Porto Mayo shahrini tanladi. Malumki, bu jamoa o'tgan mavsumni Qatar Amiri Kubogi finalida "Al Sadd"ni 4:1 hisobida mag'lub etish bilan yakunladi. Rui Faria shogirdlari OCHL navbatdagi bosqichida ham "Al Sadd"ga qarshi bahs olib borishadi. Qizig'i shundaki, bu ikki jamoa 17 avgust kuni yana bir-biriga qarshi, bu safar Shayx Jassim Kubogida maydonga tushadi.

OCHL 1/8 finalga tayyorgarlik: Arab klublari Evropada