Eronda "Persepolis" mehmoni bo'lgan "Paxtakor" 1:1 hisobini qayd etib, o'z hisobiga dastlabki ochkoni yozib qo'ydi.

Umuman olganda bu tur faqat shu o'yinda durang qayd etildi. Qolgan 5ta o'yinning to'rttasida mezbonlar g'alaba qozongan bo'lsa, bitta bellashuvda mehmon jamoaning qo'li baland keldi. Saudiya Arabistonining "Al Ahli" klubi safarda "Al Vasl"ni mag'lub etib qaytdi.

OCHL Elit. 2-tur natijalari
30 sentyabr. "Al Sadd" - "Istiqlol" 2:0
30 sentyabr. "Persepolis" - "Paxtakor" 1:1
30 sntyabr. "Al Vasl" - "Al Ahli" 0:2
30 sentyabr. "Al Nassr" - "Al Rayan" 2:1
1 oktyabr. "Al Garafa" - "Al Ayn" 4:2
1 oktyabr. "Al Hilol" - "Al Shorta" 5:0

Eng yirik hisob "Al Hilol" ishtirokidagi bahsda kuzatildi. Iroqning "Al Shorta" klubini qabul qilgan saudiyaliklar raqib darvozasiga javobsiz 5ta gol urishdi. Eng ko'p gol urilgan o'yin Qatardagi bellashuvda ro'y berdi. "Al Garafa" o'z maydonida amaldagi Osiyo chempionlar Ligasi g'olibi "Al Ayn" ustidan 4:2 hisobida zafar quchdi.

"Paxtakor" o'yini haqida

OCHL Elit ilk turida mag'lubiyatga uchragan "Paxtakor" bor etiborini ikkinchi o'yinga qaratib, ijobiy natija bilan qayd etish maqsadida Eronga yo'l oldi. "Persepolis"ga qarshi bahs qiyin kechishi malum edi, chunki bu jamoa ham ilk o'yinida mag'lubiyatga uchragandi. Shu kuni maydonda har ikki mamlakat chempionlari o'zaro bahs olib bordi.

"Paxtakor" tezkor gol o'tkazib yubordi. 1-daqiqadayoq mezbonlar hujumchisi Ali Alipur to'p kiritib, o'z jamoasini hisobda oldinga olib chiqdi. Lekin "Paxtakor" bu bilan "cho'kib" qolmadi, aksincha sekin-asta vaziyatni o'z qo'liga olishga harakat qildi. Odatda ko'p jamoalar tezkor gol o'tkazsa, buyog'iga nima qilishni bilmay qoladi. Lekin "Paxtakor" vaziyatga vazminlik bilan yondashdi va murakkab holatdan chiqib keta oldi.

"Paxtakor"ning hisobni tenglashtiruvchi goli 59-daqiqaga to'g'ri keldi. Bu vaziyatda Sardor Sobirxo'jaevdan to'pni qabul qilib olgan jamoa sardori Dragan Cheran uzoqdan kuchli zarba yo'llab gol muallifi bo'ldi. Bemalol aytish mumkin, shu kuni Cheran maydondagi eng yaxshilardan biri bo'ldi va haliyam yuqori sifatda futbol namoyish etishini isbotladi.

Sofascore "Paxtakor" o'yinchilaridan uch nafarini alohida etirof etdi. Bular - Dragan Cheran (7,7 ball), Muhammadqodir Hamraliev (7,4) va Hojiakbar Alijonov (7,4). Maydon egalari safida eng yuqori ballga gol urgan hujumchi Ali Alipur (7,7) loyiq ko'rildi. Statistikaga nazar tashlaydigan bo'lsak, shu kuni "Paxtakor" 48% to'pga egalik qildi. Darvoza tomon 19ta zarba yo'llab, shundan 5tasini darvozabon qaytardi. Taqqoslash uchun "Persepolis"da zarbalar soni 9ta bo'ldi. Bu ham "sherlar"ning nisbatan yaxshi harakat qilganini ko'rsatadi.

VIDEONI KO'RISH

"Paxtakor" ushbu durangdan so'ng 9-o'rinda bormoqda. Qolgan o'yinlarda ham ijobiy natija qayd etib, kamida 8-o'rindan pastga tushmaslik talab etiladi. Chunki keyingi bosqichga faqat 1-8 o'rinlar chiqadi. "Paxtakor"ning navbatdagi uchrashuvi 21 oktyabr kuni Iroqda "Al Shorta"ga qarshi bo'lib o'tadi.

OCHL Elit. 3-tur uchrashuvlari
21 oktyabr. "Al Shorta" - "Paxtakor"
21 oktyabr. "Al Sadd" - "Persepolis"
21 oktyabr. "Al Ayn" - "Al Hilol"
21 oktyabr. "Al Rayan" - "Al Ahli"
22 oktyabr. "Al Nassr" - "Istiqlol"
22 oktyabr. "Al Garafa" - "Al Vasl"

OCHL Elitda 2-tur tugadi. "Paxtakor"ning Erondagi o'yini haqida