Unga ko'ra vakillarimiz Janubiy Koreya, Avstraliya, Hindiston kabi terma jamoalar bilan "S" guruhidan o'rin egalladi. Biz bu borada O'zbekiston o'smirlar terma jamoasi bosh murabbiyi Olim Shokirovning fikrlari bilan qiziqdik.

"Qura haqida nima deyishim mumkin? Kuchli raqiblar tushdi. Janubiy Koreya va Avstraliyani barcha yaxshi biladi. Hindiston esa saralash bosqichida bizga jiddiy qarshilik ko'rsatdi. Endi Osiyo chempionatiga tayyorgarlik reja bo'yicha olib borilsa raqiblardan qo'rqmasak ham bo'ladi. Hozir oldimizda turgan asosiy maqsad munosib va rejadagidek tayyorgarlik ko'rish. O'rtoqlik o'yinlari orqali futbolchilarning o'z kuchiga bo'lgan ishonchini oshirishimiz kerak, ulardagi qo'rquvni butkul yo'qotishimiz lozim. Ruhiyat jihatdan ko'p ish olib borishimiz talab etiladi.

Endi guruhdan chiqqan taqdirimizda "D" guruhidagi termalar bilan to'qnash kelamiz. Saudiya Arabistoni, Yaponiya, Xitoy, Indoneziya kabi termalarning biri bilan yarim final yo'llanmasi uchun kurashamiz. Undan oldin esa guruhdan chiqish masalasini ijobiy hal qilishimiz zarur. Qaytaraman tayyorgarlikni reja bo'yicha risoladagidek olib borsak va o'yinchilar ruhiyatidagi qo'rquvni yo'qotsak raqiblar bilan o'ynay olamiz. Barcha narsa tayyorgarlikka bog'liq. Hozirda karantin bo'lgani bois navbatdagi yig'inni Toshkentda "Chig'atoy" bazasida 23 iyun va 4 iyul kunlari olib boramiz",- deydi Olim Shokirov.

Abdulaziz Iskandarov yozib oldi.

Olim Shokirov: "Tayyorgarlik reja asosida olib borilsa, hech qanday raqibdan qo'rqmasa ham bo'ladi"