Oltita mamlakatda o'ynagan, futbolni tanlashiga Asqar Tolibjonov sababchi bo'lgan Aziz Ibragimov bugun 34 yoshga to'ldi

Aslanov Jasurbek
21 jul 2020
Bugun O'zbekiston milliy terma jamoasining sobiq yarim himoyachisi, hozirda “Surxon” sharafini himoya qilayotgan tajribali futbolchi Aziz Ibragimov o'z tug'ilgan kunini nishonlamoqda.

34 yoshini qarshi olgan mahoratli yarim himoyachi vaqtida Slovakiya, Chexiya, Xitoy, Eron va Latviya chempionatlarida o'ynagan. Yurmalaning “Spartak” klubi tarkibida Latviya chempioni ham bo'lgan. 

Aziz Ibragimov - 1986 yilning 21 iyul kuni Toshkent shahrida tug'ilgan. Faoliyati davomida “Traktor” (Toshkent), “Sho'rtan” (G'uzor), “Andijon” (Andijon), “Dinamo” (Samarqand), “Buxoro” (Buxoro), “Navbahor” Slovakiyaning “Slovan” (Bratislava), Chexiyaning “Bogemians - 1905”, “Banik”, “Bogemians”, Xitoyning “Cindao”, Eronning “Mashin Sozi”, Latviyaning “Spartak” (Yurmala) klublarida to'p tepgan. U 2007-2011 yillarda O'zbekiston milliy terma jamoasi tarkibida 17 ta o'yinda maydonga tushib, 3 ta gol urgan.

U millionlar o'yiniga kirib kelishi haqida o'z intervyularining birida shunday degandi.

"8-9 yoshimda futbol bilan shug'ullana boshlaganman. Aslida futbolchi bo'laman deb sira o'ylamagandim. Karate va taekvondo sport turlariga qiziqishim baland edi. Ko'pincha Bryus Li, Jan Klod Van Dam kabi jang ustalari ishtirok etgan filmlarni sevib tomosha qilganman. Futbolga kirib kelishimga asosiy sababchi Asqar Tolibjonov hisoblanadi. Keyinchalik esa taqdir taqozosi bilan Baxtiyor Nuraliev jamoasida millionlar o'yini sir-asrorlarini o'rganishni davom ettirganman. 

Futbol men uchun hamma narsa. 18 yoshimda tibbiy ko'rikdan o'tganimda, yuragim bilan bog'liq muammo chiqqan. Aniqrog'i, shifokorlar yuragim boshqalarning yuragiga nisbatan kattaroq ekani aytishgan va menga boshqa  futbol o'ynash mumkin emasligini uqtirishganida dunyo ko'zimga qorong'u ko'ringan. Futbolchi bo'la olmasligimni xatto tasavvur ham qila olmaganman. Bu xuddi bir qizni yaxshi ko'rib qolsangizu, oila azolaringiz yo'q deyishganidek gap edi. Shukrki, shuncha yildan buyon futbol o'ynab kelayapman, yuragim hech qanday muammo chiqqani yo'q. Lekin har safar tibbiy ko'rikdan o'tganimda yuragim katta ekanini doim aytishadi. 

Terma jamoadagi eng yoqimli, eng yomon va eng chiroyli o'yinim... Adashmasam, eng yoqimli o'yin Singapurga qarshi safardagi bahs. O'shanda 7:3 hisobida zafar quchgandik. Ikkinchi bo'limda maydonga tushib gol urgandim. Eng chiroyli bahs 2007 yilgi Osiyo Kubogi doirasida Malayziyani 5:0 hisobida yutganimiz bo'lgan. Bu uchrashuvda ham gol urgandim. Eng yomon o'yinim esa Iroqqa qarshi Janubiy Koreyadagi o'rtoqlik o'yini bo'lgan. O'sha bahsning boshida qo'polligim uchun hakam menga darhol qizil kartochka ko'rsatgandi.",- deydi qahramonimiz. 

Saytimiz xodimlari nomidan Aziz Ibragimovga sog'lik va salomatlik, faoliyatida ulkan zafarlar tilab qolamiz!


Aslanov JasurbekMaqola muallifi
Muqova: championat.asia

Izohlar

Farhod_bek1990
21 jul 2020
Asqar Tolibjonov, Baabayan, Farhod Magamedov, Rustam Akramov futbolimizga foydasi tegmagan lekin futbolimizdan foydani qilgan soxta mutaxasislarimizdan.
Amir Olimhon
21 jul 2020
Аскар толибжонов Ким еди
Nematjon
21 jul 2020
Хабарингиз бор, 20 июль куни спортга ихтисослашган сайтлар ва ОАВда россиялик 63 ёшли мутахассис Алексей Ильич Беленковнинг Наманганнинг “Навбаҳор” клубида бош мураббий ёрдамчиси сифатида ишлагани, бироқ клуб ҳамда Беленков ўртасида 2023 йил 30 ноябрга қадар тузилган шартномани муддатидан аввал бекор қилингани ҳамда клуб ёрдамчи мураббийга шартнома бўйича пулларини тўламаганлиги, натижада мураббийнинг юристлари “Навбаҳор”га 150 минг АҚШ доллари тўлашни ва барча масала ёпилишини маълум қилишганини, аммо клуб бунга эътибор қилмаганлиги учун Алексей Беленков ФИФАга мурожаат қилганлиги, россиялик мутахассиснинг ҳуқуқларини SILA компанияси ҳимоя қилиши, “Навбаҳор” 30 кун ичида Беленковга 520 минг АҚШ доллари (тахминан 5 миллиард 300 миллион сўм) тўлаши шартлиги, акс ҳолда, ФИФА санкциялар қўллаши, булар трансферларни амалга оширишга тақиқ қўйиш, очколар олиб ташлаш ва қуйи лигага тушириб юбориш бўлиши мумкинлиги борасида мақола чоп этилди. Навбаҳор логотипи 2 “Навбаҳор” ПФК россиялик мутахассис Алексей Ильич Беленков масаласига оид мазкур мақола юзасидан раддия билдириб, қуйидагиларни билдиради: Алексей Беленков “Навбаҳор” жамоасида ёрдамчи мураббий сифатида ишлаган даврлари, яъни 2019 йилнинг cентябрь ойидан декабрь ойигача бўлган муддат учун клубдан ойлик маошларини тўлиқ олган. Ўтган мавсум якунланганидан сўнг, “Навбаҳор” жамоаси аъзолари мавсумлар оралиғидаги қишки таътилга чиқишади. Шу муносабат билан Алексей Беленков ўз юрти Россияга жўнаб кетганди. Шундан кейин янги йилдан сўнг, “Навбаҳор” жамоаси янги мавсумга тайёргарликни бошлайди. Бироқ Алексей Беленков жамоа ихтиёрига етиб келмайди. “Навбаҳор” ПФК раҳбарияти ушбу россиялик мутахассис билан қўнғироқлашиб, жамоага қайтишини таъкидлайди. Лекин Алексей Ильич “Навбаҳор”да фаолият юритмаслигини айтади. Шу кунгача “Навбаҳор” ПФКнинг расмий электрон почтаси манзилига жамоанинг россиялик мутахассисдан қарзи борлиги тўғрисида ҳеч қандай хат жўнатилмаган ва жамоа бу борада огоҳлантирилмаган. Шу боис, “Навбаҳор” ПФК Алексей Беленков борасидаги мақолада билдирилган ушбу мураббийга катта миқдордаги маблағ тўланиши борасидаги фикрларни асоссиз деб ҳисоблайди ва мухлислардан тасдиқланмаган бундай хабарларга ишонмасликни сўрайди. “Навбаҳор” ПФКга оид ҳар қандай расмий хабар ва маълумотлар фақатгина клуб расмий веб-сайти ҳамда ижтимоий тармоқлардаги саҳифаларида чоп этилади. “Навбаҳор” ПФК матбуот хизмати.
Fan of UNITEDs
21 jul 2020
Толибжоновни тарбиясини олган бўлса бошқа нарса кутмасак ҳам бўлоради
Одил Каршиев
21 jul 2020
Нимага Машал йук.Чет элдаги саехатлари Машал оркали бошланган эдику