Jurnalist maqtasa:

"Voy, manov laganbardorni berilib maqtashini qarang. Nimani qoyillatibdiki, og'zingdan tanobing qochib yuksaklarga ko'tarasan. Yonini olish ham evi bilan-da. Ko'zlaringni ishqalab, sinchiklab qara manovi dardisarlarga. Voy, asablarim... Do'xtirga borsam, kamida 5 millionlik dori yozib beradi. Xo'sh, buni pulini katta xolang to'laydimi?! Erishgan bo'lsa, bitta yutuqqa erishibdi. Shunga otago'ri qozixonami? Undan ko'ra tuzukroq narsa o'ylab topsang bo'lmaydimi? Senlar bularni taltaytirvorasan. Qarab tur, hali shunday kunlar keladi, meni aytdi deysan. Gaplaringni eshitib, esnoqlarim tutib ketyapti. Hoynahoy, kimgadir yaxshi ko'rinishni istayotgan bo'lsang kerak. Sendaqalar tez ko'tariladi..."

Jurnalist tanqid qilsa:

"Voy, og'zingdan laxta-laxta qoning kelgur, arpangni xom o'ribdimi, g'ayirlik qilasan. Gitler bilan Stalin ham bir-biriga bunchalik dushman bo'lmagan. Bularni shijoatini qara, shijoatini! Tuf, tuf, sendaqalarni ko'zi tegmasin! El qatori ishlasang o'lasanmi, yangiligingdan o'rgildim! O'zi hammasiga senlar aybdorsanlar, mag'lubiyatga uchrashimizgayam, GMning narxi oshishigayam, Orolni qurishigayam senlar aybdorsanlar. Qarab tur, hali shunday kunlar keladi, meni aytdi deysan. Sendaqa sho'rtumshuqlarni bitta qolmay yo'q qivorish kerak..."

Aytgancha, O'zbekiston yoshlar terma jamoasi yigitlari bilan deyarli bir haftan beri har kuni uchrashamiz. Bir-birimizga aka-ukadek bo'lib ketganmiz. Bir-birimizga hazil ham qilamiz. Shunchaki, hazil qilish mumkin bo'lgan mamlakatda hazilona lavhalar tayyorlayapmiz. Oldinda yozishim kerak bo'lgan bir qator intervyular, maqolalar, qiziqarli xabarlar turibdi. Shunchaki yana dangasaligim tutib qolyapti. Aytib bo'lmaydigan fikrlarni shaxsiy sahifam orqali berib borishga harakat qilaman.

O'qing, faqat kulmang