Журналист мақтаса:

"Вой, манов лаганбардорни берилиб мақташини қаранг. Нимани қойиллатибдики, оғзингдан танобинг қочиб юксакларга кўтарасан. Ёнини олиш ҳам эви билан-да. Кўзларингни ишқалаб, синчиклаб қара манови дардисарларга. Вой, асабларим... Дўхтирга борсам, камида 5 миллионлик дори ёзиб беради. Хўш, буни пулини катта холанг тўлайдими?! Эришган бўлса, битта ютуққа эришибди. Шунга отагўри қозихонами? Ундан кўра тузукроқ нарса ўйлаб топсанг бўлмайдими? Сенлар буларни талтайтирворасан. Қараб тур, ҳали шундай кунлар келади, мени айтди дейсан. Гапларингни эшитиб, эсноқларим тутиб кетяпти. Ҳойнаҳой, кимгадир яхши кўринишни истаётган бўлсанг керак. Сендақалар тез кўтарилади..."

Журналист танқид қилса:

"Вой, оғзингдан лахта-лахта қонинг келгур, арпангни хом ўрибдими, ғайирлик қиласан. Гитлер билан Сталин ҳам бир-бирига бунчалик душман бўлмаган. Буларни шижоатини қара, шижоатини! Туф, туф, сендақаларни кўзи тегмасин! Эл қатори ишласанг ўласанми, янгилигингдан ўргилдим! Ўзи ҳаммасига сенлар айбдорсанлар, мағлубиятга учрашимизгаям, GMнинг нархи ошишигаям, Оролни қуришигаям сенлар айбдорсанлар. Қараб тур, ҳали шундай кунлар келади, мени айтди дейсан. Сендақа шўртумшуқларни битта қолмай йўқ қивориш керак..."

Айтганча, Ўзбекистон ёшлар терма жамоаси йигитлари билан деярли бир ҳафтан бери ҳар куни учрашамиз. Бир-биримизга ака-укадек бўлиб кетганмиз. Бир-биримизга ҳазил ҳам қиламиз. Шунчаки, ҳазил қилиш мумкин бўлган мамлакатда ҳазилона лавҳалар тайёрлаяпмиз. Олдинда ёзишим керак бўлган бир қатор интервьюлар, мақолалар, қизиқарли хабарлар турибди. Шунчаки яна дангасалигим тутиб қоляпти. Айтиб бўлмайдиган фикрларни шахсий саҳифам орқали бериб боришга ҳаракат қиламан.

Ўқинг, фақат кулманг