"Мақсадимиз жиддий. Керакли натижага эришишимизга ишонаман. Ижобий натижа қайд этган холда юртимиз байроғини юқорига кўтармоқчимиз. Биз учун ушбу турнирнинг аҳамияти жуда катта. Мухлислар ишончини оқлаш учун майдонга тушамиз" - дея айтиб ўтади Eгор Кримец.

- Таркиб борасида терма жамоамиз мазкур чемпионатда энг ёш жамоалардан бири бўлмоқда. Бу натижага таъсир ўтказмасмикин?

- Таркиб борасида ҳар қандай жамоа билан тенгмиз. Керак бўлса кўпгина жамоалардан устунмиз деса ҳам бўлади. Аллақачон халқаро майдонларда ўзини кўрсатган футболчиларимиз етарлича топилада. Ўзига яраша тажрибали ўйинчилар бор ва бу борада ҳеч қандай баҳона бўлмаслиги шарт.

- Терма жамоадаги ягона легионер футболчи сифатида имкониятларимизни бошқа давлат вакиллари билан солиштирдингизми?

- Албатта. Хитой биз учун энг қийин рақиб бўлса керак деб ўйлайман. Жамоаси ҳақида хабарим бор ва уларнинг имкониятларини яхши баҳолайман. Тўлиқ маҳаллий клубларнинг футболчиларидан иборат. Уларнинг барчаси Лиганинг доимий иштирокчиларидандир. Ироқ ва Саудия Арабистони ҳам яхши жамоалар. Қисқаси бизнинг гуруҳ деярли тенг кучли жамоалардан иборатдир.

- Шахсан Сиз ушбу чемпионатдан нималарни кутмоқдасиз ?

- Қисқача айтганда финалга етиб бормоқчимиз. Бунга ҳар бир футболчимиз ишонса натижага эришамиз.

Ҳумоюн Давуров суҳбатлашди

Осиё чемпионати (U-22) олдидан. Eгор Кримец: "Хитой энг оғир рақиб бўлади"