Barchani etibori Kataloniya va Manchesterga qaratilishi shubhasiz. Ammo, afisha jihatida ushbu bahslar bilan raqobat qilolmasa-da, bulardan qiziqarliroq kechishi kutilayotgan o'yinlar ham yo'q emas. Quyida shunday uchrashuvlardan bir nechtasini keltiramiz. O'tkazib yubormang!

APL. "Lids Yunayted" - "Tottenxem" (16:30)

Marselo Belsa boshchiligidagi "Lids" Angliyaning eng quvnoq klublaridan biri bo'lib turibdi. Jamoa gol urishni qanchalik yoqtirsa, shuncha o'tkazib yuboradi ham. Etiborli jihati, "Lids" ishtirokidagi o'yinlarda kamdan kam hollarda kuchlar teng keladi - joriy mavsum eng kam durang o'ynagan klublardan biri bo'lib turibdi (5). Mourinyusiz qolgan "Tottenxem" so'nggi turda yirik hisobda g'alaba qozonganini inobatga olsak, bugun ham ko'p gol ko'ramiz. Eng muhimi, tomoshabop futbol kafolatlangan.

RPL. "Lokomotiv" - "Dinamo" (18:30)

Rossiya chempionati muxlislari 18:30 da "Moskva derbisi" guvohiga aylanishlari mumkin. "Dinamo" 1-davrada "Lokomotiv"ni yirik (5:1) hisobda mag'lub qilgandi. Tabiiyki, "temiryo'lchilar" bugun "intiqom" uchun maydonga tushadi. Ushbu jamoalar o'rtasidagi so'nggi 3 o'yinga etibor qaratsak, 12 ta gol urilganiga guvoh bo'lamiz. Bugungi o'yin ham katta ehtimol bilan gollarga boy bo'ladi.

Bundesliga. "Borussiya" - "Leypcig" (18:30)

Joriy mavsum ishlari yurishmayotgan "arilar" 35-turda "Leypcig"ni qabul qiladi. Edin Terzich jamoasi kelasi mavsum Evropa Chempionlar Ligasida ishtirok etishni istasa, bugun g'alaba qozonishi kerak. Ko'ramiz, "Leypcig" bunga yo'l qo'yib beradimi. Har holda oxirgi bahslardagi ustunlik "Borussiya"da.

Bundesliga. "Bavariya" - "Borussiya M" (21:30)

Chempionlik vazifasini naqd qilgan "Bavariya" bugun evrokuboklar yo'llanmasi uchun kurashayogan Myonxengladbaxning "Borussiya"sini qabul qiladi. Malumot uchun, ushbu jamoalar o'rtasidagi oxirgi 5 o'yinning 3 tasida myonxengladbaxliklar zafar quchishgan. 1-davradagi bahsda ham "Bavariya" 3:2 hisobida engilgan edi. Demak, Flik boshchiligidagi "gollivud" bugun alamini olishga harakat qilib ko'radi.

Turkiya Superligasi. "Galatasaroy" - "Beshiktosh" (22:30)

Ehtimol, bugungi kun doirasidagi eng qiziq o'yin Istanbulda bo'ladi. Mazkur shahar jamolari o'rtasidagi bahslar har doim qiziq bo'lgan. Bunda tomonlar nafaqat maydon ichida, balki uning tashqarisida, mediada ham kurashishadi. Bugungi g'alaba "Beshiktosh" uchun chempionlik masalasini deyarli kafolatlab qo'yishini hisobga olsak, galatasaroychilar g'alaba uchun maydonda "jonini berishi"ni taxmin qilish qiyin emas.

O'tkazib yubormaslik tavsiya qilinadi