Барчани эътибори Каталония ва Манчестерга қаратилиши шубҳасиз. Аммо, афиша жиҳатида ушбу баҳслар билан рақобат қилолмаса-да, булардан қизиқарлироқ кечиши кутилаётган ўйинлар ҳам йўқ эмас. Қуйида шундай учрашувлардан бир нечтасини келтирамиз. Ўтказиб юборманг!

АПЛ. "Лидс Юнайтед" — "Тоттенхэм" (16:30)

Марсело Бьелса бошчилигидаги "Лидс" Англиянинг энг қувноқ клубларидан бири бўлиб турибди. Жамоа гол уришни қанчалик ёқтирса, шунча ўтказиб юборади ҳам. Эътиборли жиҳати, "Лидс" иштирокидаги ўйинларда камдан кам ҳолларда кучлар тенг келади — жорий мавсум энг кам дуранг ўйнаган клублардан бири бўлиб турибди (5). Моуриньюсиз қолган "Тоттенхэм" сўнгги турда йирик ҳисобда ғалаба қозонганини инобатга олсак, бугун ҳам кўп гол кўрамиз. Энг муҳими, томошабоп футбол кафолатланган.

РПЛ. "Локомотив" — "Динамо" (18:30)

Россия чемпионати мухлислари 18:30 да "Москва дербиси" гувоҳига айланишлари мумкин. "Динамо" 1-даврада "Локомотив"ни йирик (5:1) ҳисобда мағлуб қилганди. Табиийки, "темирйўлчилар" бугун "интиқом" учун майдонга тушади. Ушбу жамоалар ўртасидаги сўнгги 3 ўйинга эътибор қаратсак, 12 та гол урилганига гувоҳ бўламиз. Бугунги ўйин ҳам катта эҳтимол билан голларга бой бўлади.

Бундеслига. "Боруссия" — "Лейпциг" (18:30)

Жорий мавсум ишлари юришмаётган "арилар" 35-турда "Лейпциг"ни қабул қилади. Эдин Терзич жамоаси келаси мавсум Европа Чемпионлар Лигасида иштирок этишни истаса, бугун ғалаба қозониши керак. Кўрамиз, "Лейпциг" бунга йўл қўйиб берадими. Ҳар ҳолда охирги баҳслардаги устунлик "Боруссия"да.

Бундеслига. "Бавария" — "Боруссия М" (21:30)

Чемпионлик вазифасини нақд қилган "Бавария" бугун еврокубоклар йўлланмаси учун курашаёган Мёнхенгладбахнинг "Боруссия"сини қабул қилади. Маълумот учун, ушбу жамоалар ўртасидаги охирги 5 ўйиннинг 3 тасида мёнхенгладбахликлар зафар қучишган. 1-даврадаги баҳсда ҳам "Бавария" 3:2 ҳисобида енгилган эди. Демак, Флик бошчилигидаги "голливуд" бугун аламини олишга ҳаракат қилиб кўради.

Туркия Суперлигаси. "Галатасарой" — "Бешиктош" (22:30)

Эҳтимол, бугунги кун доирасидаги энг қизиқ ўйин Истанбулда бўлади. Мазкур шаҳар жамолари ўртасидаги баҳслар ҳар доим қизиқ бўлган. Бунда томонлар нафақат майдон ичида, балки унинг ташқарисида, медиада ҳам курашишади. Бугунги ғалаба "Бешиктош" учун чемпионлик масаласини деярли кафолатлаб қўйишини ҳисобга олсак, галатасаройчилар ғалаба учун майдонда "жонини бериши"ни тахмин қилиш қийин эмас.

Ўтказиб юбормаслик тавсия қилинади