O'tgan asr oxirida "Navbahor" va "Do'stlik" klublaridagi faoliyati bilan yurtimiz futboli ishqibozlariga yaqindan tanish bo'lgan mutaxassis 83 yoshida olamdan o'tdi.

Bu haqida taniqli futbol mutaxassisi Alisher Nikimbaev o'zining telegramdagi kanalida shunday yozadi:

"Bugun Leonid Ostroushko vafot etdi. Ham O'zbekiston chempionati, ham mamlakat kubogida g'alaba qozongan birinchi xorijlik murabbiy. U O'zbekiston terma jamoasi murabbiyi sifatida o'tkazgan yagona o'yinida Bora Milutinovich boshqaruvi ostidagi Xitoy terma jamoasini mag'lubiyatga uchratgandi.
Albatta, Leonid Konstantinovich tarixda eng avvalo SSSR chempionatining asosiy ligasida 200 ta uchrashuv o'tkazgan "Qayrat" klubi futbolchisi sifatida qoladi.
Leonid Ostroushko 83 yoshda edi. U uzoq va sharafli hayot kechirdi. Bugun esa u oramizda yo'q. Undan yorqin xotira qoldi...".

Ushbu fikrlarga qo'shimcha qilishimiz mumkinki, Leonid Konstantinovich Ostroushko 1936 yilning 10 avgustida Ukrainada tavallud topgandi. Futbolchilik faoliyati Kievning "Dinamo"si va Qozog'istonning "Qayrat" klubi safida o'tgan. Qozog'iston, Rossiya va O'zbekistonda xizmat ko'rsatgan murabbiy, sport ustasi. Marhum mutaxassisning so'nggi klubi Minskning "Dinamo" klubi bo'lgandi.

O'zbekiston chempionati va kubogida g'alaba qozongan birinchi xorijlik mutaxassis olamdan o'tdi