O'zbekiston milliy terma jamoasi 10 sentyabr kuni Toshkentda Iordaniya milliy terma jamoasiga qarshi maydonga tushib, JCH saralash o'yinlari tarixidagi eng yaxshi natijasini takrorlaydi. Xabaringiz bor, O'zbekiston milliy terma jamoasi 2005 yili Baxrain terma jamoasiga ikki o'yin natijasiga ko'ra Osiyo mintaqasi saralash pley-off o'yinlarida mag'lubiyatga uchragan.

10 sentyabr kuni O'zbekiston milliy terma jamoasi Toshkentdagi Paxtakor stadionida, JCH-2014 saralash pley-off javob o'yini doirasida Iordaniya terma jamoasini qabul qiladi. Ammanda bo'lib o'tgan ilk o'yinda 1:1 hisobidagi durang natija qayd etildi.

Ayni damda milliy terma jamoa safida to'p surayotgan futbolchilar orasida to'purar bo'lib turgan Server Jeparov Ammandagi uchrashuvda raqib darvozasini ishg'ol etgan edi. Bu uning terma jamoa safidagi 21 goli bo'ldi. Bu - milliy terma jamoa safida ayni paytda to'p surayotgan futbolchilar orasidagi eng yaxshi ko'rsatkichdir. Iordaniyaga qarshi uchrashuvda zahiradan maydonga tushgan Ulug'bek Baqoev esa, shu paytgacha milliy terma jamoa safida 14 golga mualliflik qilgan.

Terma jamoa to'purarlari ro'yxatini Maksim Shackix boshqarib turibdi. Uning hisobida 34 gol mavjud. O'zbekiston milliy terma jamoasining ayni paytdagi bosh murabbiyi Mirjalol Qosimov hisobida esa 31 gol bor.

Terma jamoa safida eng ko'p o'yin o'tkazgan futbolchi Temur Kapadze bo'lib turibdi. Tajribali yarim himoyachi Ammandagi o'yinda terma jamoa safida 108 o'yinini o'tkazdi. Ammandagi ilk uchrashuvda terma jamoa sardori Server Jeparov ham o'zining 95 uchrashuvini o'tkazgani etiborga molik. Malumot o'rnida, milliy terma jamoa himoyachisi Anzur Ismoilov, Iordaniyaga qarshi 10 sentyabr kuni maydonga tushsa, bu uning terma jamoa safidagi yubiley - 50 uchrashuvi bo'ladi.

Iordaniyaga qarshi javob uchrashuvida O'zbekiston terma jamoasining bir nechta futbolchilari ogohlantiriladigan taqdirda, saralashning navbatdagi o'yinlarini o'tkazib yuborishadi. O'zbekiston terma jamoasi safida avvalgi o'yinlarda ogohlanitirilgan futbolchilarning soni 8ta.

OSILIB TURGANLAR
Shavkat Mullajonov, Anzur Ismoilov, Server Jeparov, Sanjar Tursunov, Odil Ahmedov, Vitaliy Denisov, Azizbek Haydarov, Akmal Shorahmedov.

O'zbekiston JCH saralash o'yinlari tarixidagi eng yaxshi natijasini ko'rsatishi mumkin