Доимгидек ҳар бир тур бизга бир қанча қизиқарли тўқнашувларни тақдим қилмоқда. Дейлик Фарғонада ўзбек эл класикоси номини олган "Нефтчи" - "Пахтакор" жамоалари учрашса, яраланган "аждарлар" бу сафар ўз майдонида мавсумни мағлубият билан бошлаган "Турон"ни қабул қилади. Шу ва бошқа баҳслар олдидан таниқли собиқ футболчи Анвар Ғофуровнинг фикрлари билан қизиқдик.

"Сўғдиёна" - "Олимпик"

— Мезбонлар ўтган турда "Бунёдкор"дан учралган мағлубиятдан сўнг тўғри хулоса чиқарган, деб ўйлайман. Улар "Олимпик"га қарши бор имкониятларини ишга солишади. Тимур Кападзе шогирдлари кўтаринки кайфиятда етиб келишлари шубҳасиз. Таркибда иқтидорли ва ёш ижрочилар кўп. Лекин амалдаги чемпион устидан қўлга киритилган ғалабадан сўнг бўшроқ ўйин кўрсатиши эҳтимоли ҳам йўқ эмас.

Имкониятлар: 40/60

"Нефтчи" - "Пахтакор"

— "Нефтчи" яхши жамоа ва биринчи турда ўз ўйини билан буни исботлади. Лекин эртанги учрашувда умуман бошқа таркибдаги жамоага қарши майдонга чиқишади. Шуниси аниқки, Фарғонада икки жамоа учун ҳам осон ўйин бўлмайди. "Пахтакор" биринчи турда ўз майдонида "Олимпик"дан қабул қилиб олган мағлубият тасодиф эканлигини кўрсатишлари учун ҳам барча кучни сарф қилишади. Фикримча, тажрибали футболчилар бу ўйинда ўз сўзини айтади. Мазкур баҳс мутахассислари кузатиши учун ҳам қизиқарли кечади. "Нефтчи"ни шу куни етарлича ишқибозлар қўллаб-қувватлайди.

Имкониятлар: 45/55

"Пахтакор" Фарғонада мағлубият тасодифлигини исботлайдими? Жиззахда кимнинг имконияти юқори? — 2-тур олдидан мутахассис фикри