Quyida Ivan Boshvokich jamoasi mavsum oralig'ida qanchalik o'zgargani, tarkibda kimlar paydo bo'lgani-yu, kimlar ketgani haqida so'z yuritamiz.

Tarkib va transferlar

"So'g'diyona" tajribali futbolchilari va legionerlari bilan xayrlashdi. Legiogerlardan bosniyalik himoyachi Tarik Isich, serbiyalik himoyachi Marko Kolakovich, bosniyalik hujumchi Zenan Zaymovich jamoadan ketishdi. Mahalliy o'yinchilardan tajribali yarim himoyachilar Jasur Hasanov, Javohir Qahramonov va Sanjar Shoahmedov bilan xayrlashishdi. Shuningdek, Ollabergan Karimov va Abdulloh Omonaliev jizzaxliklar safini tark etdilar.

Jamoaga quyidagi futbolchilar kelib qo'shilishdi:

Muhammadyusuf Sobirov ("Bunyodkor");
Zoran Petrovich ("Petrolul")
Aleksey Nosko (BATE)
Sardor Qulmatov ("Terengganu")
Islom Qobilov ("Lokomotiv")
Oleg Zoteev ("Lokomotiv")
Shohruh Abdurahmonov ("Energetik-BGU")
Vladimir Yovovich ("Yablonec").

Jamoa ketganlar o'rnini to'ldirishga faol kirishdi. Masalan, U-17 Jahon chempionatida O'zbekiston darvozasini qo'riqlagan Muhammadyusuf Sobirov, mudofaa vakillaridan Aleksey Nosko, Sardor Qulmatov, Islom Qobilov va tajribali Oleg Zoteev taklif etildi.

Faoliyati mobaynida Belarusning "Energetik-BGU" jamoasida legioner maqomida harakat qilgan xavbek Shohruh Abdurahmonov, Chernogoriya terma jamoasi yarim himoyachisi Vladimir Yovovich tarkibga qo'shib olindi.

Bundan tashqari, chernogoriyalik hujumchi Zoran Petrovich bilan shartnoma imzolandi.

"So'g'diyona" ustozi Ivan Boshkovich yangi mavsum oldidan tashkil qilingan intervyuda quyidagilarni takidlagandi:

"Tarkibni Superliganing etakchi futbolchilari bilan kuchaytirishga harakat qilmoqdamiz. Bizning o'yin uslubimiz va vazifamiz ham selekciya qilishda muhim ahamiyat kasb etadi", – degandi Boshkovich.

Yig'inlar va o'rtoqlik o'yinlaridagi natijalar

"So'g'diyona" jamoasining xorijiy yig'ini Turkiyaning Antaliya shahrida olib borildi. Jamoa u erda bir nechta o'rtoqlik bellashuvlarida ishtirok etdi.

Quyida o'yinlarning to'liq ro'yxati va ulardagi natijalar bilan tanishtiramiz:

16 yanvar | "So'g'diyona" – "Sumgait" (Ozarbayjon) 1:3
Gol: Mavlonqulov.
22 yanvar | "So'g'diyona" – "Malisheva" (Kosovo) 1:1
Gol: Lyupche Doriev.
25 yanvar | "So'g'diyona" – "Visla" Plock (Polsha) 2:3
Gollar: Mavlonqulov (dubl).
6 fevral | “So'g'diyona” – “Vorskla” (Ukraina) 1:3
Gol: Lyupche Doriev.
9 fevral | “So'g'diyona” – “Selimbar” (Moldova) 2:2
Gollar: Petrovich (dubl).
13 fevral | "So'g'diyona" – "Belc" 2:2
Gollar: Abdurahmonov (dubl).
19 fevral | “So'g'diyona” – “Liepaya” 2:1
Gollar: Mavlonqulov (dubl).

"So'g'diyona" qishki yig'inda jami 7 ta uchrashuvda ishtirok etdi. Jamoa bu bahslardan faqat 1 tasida g'alaba qozona oldi, 3 marta durang o'ynagan bo'lsa, 3 ta o'yinda mag'lubiyatga uchradi.

Murabbiylar shtabi va klub boshqaruvidagi o'zgarishlar

"So'g'diyona" murabbiylar shtabida aytarli o'zgarish kuzatilmadi. Klub rahbariyatida ham o'zgarish amalga oshmadi.

"So'g'diyona"ning taxminiy tarkibi

"So'g'diyona"ning "Neftchi"ga qarshi o'yindagi ehtimoliy tarkibi quyidagicha ko'rinish oladi:

Mitrovich, Qobilov, Yoqubov, Salimov, Andreev, Zoteev, Abdurahmonov, Soyibov, Petrovich, Doriev, Mavlonqulov

Malumot o'rnida, "So'g'diyona" "Neftchi"ga qarshi oxirgi 3 ta o'yinda umuman gol urolmagan.

"So'g'diyona" yangi mavsumga qanday tayyorgarlik ko'rdi: Ivan Boshkovich raqobatbardosh jamoa tuza oldimi?