Uchrashuv 2:1 hisobida maydon egalari g'alabasi bilan yakuniga etgan, "Paxtakor" futbolchilari g'alaba to'pini qo'shimcha daqiqalarda belgilangan penaltidan kiritishgan edi.

Uchrashuvni FIFA referisi Sherzod Qosimov boshqarib borgan, unga qanotlarda FIFA referisi yordamchilari – Alisher Usmonov va Temur Gaynullin yordam bergandi. Birinchi toifali hakam Igor Gormashev uchrashuv zaxira hakami sifatida belgilangan bo'lsa, hakamlarning harakatini esa respublika toifasidagi nazoratchi Bulat Galeev baholab borgan.

21 may, chorshanba kuni ushbu uchrashuv tahlili yuzasidan O'FF ekspert-hakamlar komissiyasi yig'ilishi bo'lib o'tdi. Mutaxassislar uchrashuvning etiborga molik uchta vaziyati – 42-daqiqada "Navbahor" o'yinchisi Rahmatullo Berdimurodovga ko'rsatilgan birinchi sariq kartochka, 75-daqiqada Berdimurodovga ko'rsatilgan ikkinchi sariq kartochka, shuningdek, 90+4-daqiqada "Navbahor" o'yinchisi Yuriy Rijkoga ko'rsatilgan qizil kartochka va "Navbahor" darvozasiga belgilangan penaltiga etibor qaratishdi.

Ekspertlar xulosasiga ko'ra, Rahmatullo Berdimurodovga birinchi sariq kartochka futbolchi raqibini qasddan chalib yiqitgani uchun, ikkinchi sariq sariq kartochka esa futbolchi "Navbahor" foydasiga jarima zarbasi belgilanganidan so'ng to'pni qasddan otib yuborgani va o'yinning qayta boshlanishini kechiktirgani uchun haqqoniy ravishda ko'rsatilgan. Ushbu vaziyatlarda uchrashuv bosh hakami Sherzod Qosimov to'g'ri harakat qilgan.

Uchrashuvning 90+4-daqiqasida "Navbahor" o'yinchisi Yuriy Rijko o'z jarima maydonchasi ichida harakatlanayotib, avvaliga "Paxtakor" jamoasi o'yinchisi Egor Krimecni qo'pollik bilan turtib yuborgan, shundan so'ng o'ng qo'li tirsak qismi bilan uning iyagiga zarba bergan. Ushbu holatda uchrashuv bosh hakami Sherzod Qosimov Rijkoga haqqoniy qizil kartochka ko'rsatgan va "Navbahor" darvozasiga 11 metrli jarima zarbasi belgilagan.

"Uchrashuv yakuniy natijasiga tasir qilmagan ahamiyatsiz xatolarni istisno qilganda, umuman brigada o'yinni yaxshi o'tkazdi", - deyiladi ekspert-hakamlar komissiyasi xulosasida.

Malumot uchun, O'zbekistonning umidli yosh hakamlaridan biri hisoblangan Sherzod Qosimov boshchiligidagi hakamlar brigadasi 26 may, dushanba kuni "Metallurg" (Bekobod) va "Dinamo" (Samarqand) jamoalari o'rtasidagi O'zbekiston Kubogi nimchorak final javob o'yinini boshqarib boradi.

"Paxtakor" – "Navbahor" uchrashuvida hakamlar brigadasi qo'pol xatolarga yo'l qo'ymadi