"Qo'qon-1912" - AGMK o'rtasidagi to'qnashuv tarixiga etibor qaratadigan bo'lsak, ustunlik olmaliqliklar tarafida. Hozirga qadar o'tkazilgan 11 uchrashuvda AGMK 6 marotaba g'alaba nashidasini surgan. Shuningdek, 2 o'yinda durang qayd etilgan va 3 bellashuvda "Qo'qon-1912" jamoasining qo'li baland kelgan. To'plar nisbati ham tabiiyki olmaliqliklar foydasida: 19-14.

Ushbu jamoalar to'qnashuvida eng yirik hisob joriy mavsumda qayd etildi. Olmaliqda mehmon bo'lgan qo'qonliklar darvozasiga AGMK 7 marotaba yo'l topib, yakunda 7:1 hisobida g'alaba qozongandi.

Mazkur jamoalarning Qo'qonda o'tgan o'yinlarida ham olmaliqliklar ko'proq g'alabani tantana qilgan. "Qo'qon-1912" hozirga qadar o'z uyida o'tgan 5 uchrashuvdan 2tasida g'alaba qozongan bo'lsa, qolgan 3 o'yinda AGMK ustunlikka erishgan. Qizig'i, Qo'qondagi o'yinlarda hozircha durang qayd etilgani yo'q.

Turnir jadvaliga etibor qaratadigan bo'lsak, ayni paytda AGMK 26 ochko bilan 9-o'rinda bormoqda. "Qo'qon-1912" esa 24 ochko to'plab 11-pog'onani egallab turibdi.

Mazkur o'yinni birinchi davrada bo'lgani kabi tajribali hakam Sherzod Qosimov boshqaradi. Mazkur tayinlov Sherzod Qosimov uchun AGMK ishtirokidagi 18-o'yinga aylanadi.

Bunga qadar Sherzod Qosimov olmaliqliklar o'yinlarini 17 marotaba boshqargan va unda turli xil natijalar qayd etilgan. Sherzod Qosimov boshqargan o'yinlarga etibor qaratadigan bo'lsak, tajribali referi boshqargan uchrashuvlarda AGMK 7 g'alaba, 3 durang va 7 mag'lubiyat qayd etgan. Olmaliqda o'tgan o'yin AGMK hujumchisi Zafar Polvonovning benifisiga aylanib ketgan va hujumchi beshta gol urgandi. Shuningdek, qolgan ikkita to'pni shu kuni dubl qayd etgan Dilshod Jo'raev kiritgandi.

Eslatib o'tamiz, Qo'qonda kechadigan "Qo'qon-1912" - AGMK o'rtasidagi o'yin 23 noyabr kuni soat 14:30da boshlanadi.

Prevyu: "Qo'qon-1912" - AGMK