Mavsumning ikkinchi qismini boshlab berish cheki ham yana shu jamoalar zimmasiga yuklatildi. Turnir jadvali, jamoalarning holati va boshqa faktorlarni inobatga olganda qaysidir manoda turning markaziy uchrashuvlaridan biri hisoblanadi.

O'zaro o'yinlar

O'zaro o'yinlar jadvaliga nazar tashlasak, jamoalar bugungacha rasmiy o'yinlarda 6 bor to'qnash kelishgan. 1 ta uchrashuv vakillarimizning g'alabasi bilan yakunlangan bo'lsa, 2 ta bahsda durang natija qayd etilgan. Yana 3 ta o'yin “Buxoro” g'alabasi bilan yakuniga etgan. To'plar nisbati 8-7, buxoroliklar foydasiga.

Quyida jamoalarning ortda qolgan o'zaro uchrashuvlarida qayd etilgan natijalarni xronologik ketma-ketlik asosida koʻrib chiqamiz:

19.03.2022. Pro-liga. 3-tur.

“Buxoro” - “Turon” 2:1.

Gollar: Sobit Sindarov, 1 (1:0), Obid Jo'raboev, 14 (2:0), Xumoyun Murtozaev, 21 (2:1).

13.06.2022. Pro-liga. 12-tur.

“Turon” - “Buxoro” 2:0

Gollar: Xumoyun Murtozaev, 9 (1:0), Xumoyun Murtozaev, 18 (2:0).

25.09.2022. Pro-liga. 19-tur.

“Turon” - “Buxoro” 2:2.

Gollar: Abdulazizxon Abdurashidov, 16 (1:0), Abduxoliq Qurbonov, 24 (1:1), Ro'zimboy Ahmedov, 50 (1:2), Xumoyun Murtozaev, 62 (2:2).

01.11.2022. Pro-liga. 24-tur.

“Buxoro” - “Turon” 1:0.

Gol: Ro'zimboy Ahmedov, 48 (1:0).

05.03.2023. Coca-Cola Superliga. 1-tur.

“Turon“ - ”Buxoro“ 1:2

Gollar: Xumoyunmirzo Iminov, 30 (0:1) Anri Chichinadze, 46 (1:1), Temur Ismoilov, 80 (1:2).

12.04.2023. O'zbekiston kubogi. 1-tur.

”Buxoro“ - ”Turon“ 1:1.

Gollar: Obid Jo'raboev, 29 (1:0), Milan Boyovich, 90+4 (1:1).

Bugungi bahs jamoalar ishtirokidagi o'zaro 7-o'yin bo'ladi. Eslatib o'tamiz, ”Buxoro“ - ”Turon“ uchrashuvi ”Sport“ telekanali orqali bugun soat 19:50dan boshlab jonli efirda namoyish etiladi.

Tayyorgarlik va tarkibdagi o'zgarishlar

Jamoalar taraddud jarayonida ikki xil lokaciyalardan foydalandi. "Buxoro" mashg'ulotlarning asosiy qismini Tojikistonda olib bordi va u erda bir nechta o'rtoqlik uchrashuvlarida maydonga tushdi. Bu orada selekciya ishlari olib borildi. Birinchi davrada hujum chizig'ida oqsagan klub bu borada Shohruz Norxonovni jalb qildi, darvoza chizig'idagi muammo Luka Kukich bilan bartaraf etildi. Tajriba borasida "Buxoro" raqibiga nisbatan yaxshiroq ijrochilarni qo'shib oldi. Bakaev bilan Fuzaylovning futbolida farq katta va tarkib ham mavsum boshida shunga yarasha yig'ilgandi. Endilikda murabbiy o'z falsafasiga mos, uslubiga mos keladigan o'yinchilarni atrofiga jamlayapti. Bunda Stanislavlevich va Norxonov muhim figura bo'lib xizmat qiladi. Davralar oralig'idagi o'rtoqlik uchrashuvlarida ham aynan shu ikki juftlik tandem hosil qilishga va oldinda faollikni oshirishga harakat qildi.

"Esxata" - "Buxoro" 0:3

"Ravshan" - "Buxoro" 1:2

"Xo'jand" - "Buxoro" 2:1

Ketganlar: Fayzullobek Jumanqo'ziev, Ixtiyor Toshpo'latov, Ro'zimboy Ahmedov, Jasur Xasanov, Timur Ismoilov, Jasur Azimov, Nikola Stoshich, Obid Jo'raboev

Kelganlar: Luka Kukich, Frane Ikich, Shohruz Norxonov, Diyorbek Ortiqboev, Mahmud Jo'raboev, Muhammadjon Rahimov, Izzatillo Po'latov, Shohjahon Xayrullaev, Asliddin Tursunpo'latov

"Turon" "Rubin" bilan o'rtoqlik uchrashuvi doirasida qisqa vaqt Qozon shahrida mashg'ulotlarni olib bordi. Tarkibda katta o'zgarishlarga ko'l urgan yaypanliklar barcha etakchi va legionerlarga javob berib yubordi va ikkinchi davrada yoshlarga tayanishga qaror qildi. Balki kechdir, lekin o'ynamayotgan yoshlar uchun bu ayni payti va imkoniyati. Hali "Turon" Superligadan butunlay umidni uzmagan va kichik imkoniyatdan foydalanishga urinib ko'radi. Aynan bugungi bahs burilish nuqtasiga aylanadi.

"Rubin" – "Turon" 3:0

Gollar: Famaye, Daku (dubl)

Ketganlar: Anri Chichinadze, Nikola Kumburovich, Zakariya Beglarashvili, Milan Boyovich, Dushan Stoilkovich, Azim Ahmedov, Bilolxon Toshmirzaev, Sardor Abduraimov, Shohnazar Norbekov, Humoyun Murtozaev, Quvondiq Ro'ziev

Kelganlar: Fayzullo Jumanqo'ziev, Azizbek Xolmurodov, Javohir Alijonov, Nodirbek Mukarov, Abubakir Ashurov, Shahzodbek Rahmatullaev, Shohmalik Komilov, Sardor Xursandov, Akbarjon Abdirasulov, Abdurahim Saydullaev, Ravshan Xayrullaev

Turnir jadvalidagi holat

Ayni paytda ikki jamoa turnir jadvalida yonma-yon bormoqda. Ochkolar o'rtasidagi tafovut 1 ochkoni tashkil qilmoqda, xolos. Bu degani "Turon" bugun g'alaba qozongan taqdirda "Buxoro"ni jadval finishiga ravona qiladi. Boz ustiga "So'g'diyona"da ishlari yurishmagan Yorqin Nazarov "Turon"dagi mahalliy yigitlar bilan nimalarga qodirligini, Jizzaxdagi natijalar tasodifligini isbotlashi shart. "Buxoro"ni esa g'alabadan boshqa natija qutqara olmaydi. Uch ochko qo'lga kiritish bilan birga "Qizilqum"ning mag'lubiyatini kutishga majbur. Shunda ham jamoa jadvalda o'z o'rnida qoladi. Intriga keyingi turlarda ham davom etadi, buni qarangki "Buxoro" 15-turda "Qizilqum"ni qabul qilar ekan. "Turon" esa "Nasaf"ni mehmon qiladi. Bugun ikki jamoa uchun g'alabadan boshqa natija qoniqarsiz bo'lishi shubhasiz.

PREVYU. Turnir jadvalidagi qo'shnilar to'qnashuvi yoxud "Turon" "Buxoro"ni quvib o'ta oladimi?