O'yin kutilganidek maydon egalarining faol hujumlari bilan boshlandi. Dastlabki daqiqalardanoq raqib darvozasini ishg'ol etish uchun harakatlarni boshlagan farg'onaliklarda bir qator qulay vaziyatlar yuzaga kela boshladi. Birinchi bo'limning dastlabki 20 daqiqlagida Farg'ona jamoasining hujumlarida faollik ko'rsatgan Sobit Sindarov, Ulug'bek Hoshimov, Ruslan Rozievlar bir qator golli vaziyatlarga bo'lishdi. Ushbu daqiqalar ichida "Sho'rtan" jamoasining himoyadagi tartibli o'yini, shuningdek jamoa sardori va darvozabonining faol o'yini farg'onaliklarga gol urishga imkon bermadi. Kombinacion o'yin samara keltirmagach, "Neftchi" vakillari uzoq masofalardan ham zarba yo'llab o'z omadlarini sinab ko'ra boshladilar. Shunday vaziyatlar natijasida uchrashuvda hisob ochildi. Birinchi bo'limning 29-daqiqasida Sobit Sindarovning uzoq masofadan yo'llagan kuchli zarbasi "Sho'rtan" darvozasidan o'rin oldi - 1:0. Bo'lim so'ngiga qadar o'yindagi hisob boshqa o'zgarmadi va tanaffusga "Neftchi" vakillari kichik hisobdagi g'alaba bilan chiqib ketishdi.

Bellashuvning ikkinchi bo'limi ham birinchi bo'limga o'xshash ko'rinishda o'tdi. Farg'onaliklar ketma-ket tashkil etilgan hujumlar natijasida raqib darvozasiga ikkinchi golni kiritish uchun harakat qilgan bo'lsalar, "Sho'rtan" vakillari qarshi hujumlarda o'z omadlarini qidirishdi. Ko'plab vaziyatlarda g'uzorliklar hujumchisi Bekzod Suvonov oldingi chiziqda yolg'izlanib qolgandek ko'rindi.

Farg'ona jamoasining ketma-ket hujumlari natijasida 74-daqiqada g'uzorliklar darvozasi ikkinchi bor ishg'ol etildi. Yana o'sha Sobit Sindarovning ajoyib uzatmasiga Saydullo Rahmatov yaqin masofadan zarba yo'llab gol urdi - 2:0. O'yin yakuniga qadar darvozalarga boshqa gol urilmadi va "Neftchi" navbatdagi 3 ochkoni o'z hisobiga yozib qo'ydi.

PRO-Liga. 7-tur.
"Neftchi" - "Sho'rtan" 2:0 (1:0)
Farg'ona. "Istiqlol" stadioni.
Hakamlar: Ibrohim Ismoilov, Daler Tilloev, Otabek Qosimov
Nazoratchi: Andrey Tambovcev
Komissar: Jamshid Imomov.
Gollar: Sobit Sindarov, 29 (1:0), Saydullo Rahmatov, 74 (2:0).
"Neftchi": 45. Akbar To'raev, 2. Akmal Shorahmedov, 7. Sobit Sindarov, 14. Sherzod Karimov, 17. Abdulloh Olimov, 18. Shavkat Mullajonov, 31. Saydullo Rahmatov, 44. Darko Stanoevich, 71. Ruslan Roziev, 91. Marko Obradovich, 99. Ulug'bek Hoshimov
Zaxira: 1. Mashhurjon Muhammadjonov, 5. Darko Stanoevich, 6. Xudoyshukur Sattorov, 9. Otabek Zokirov, 10. Sardor Abdunabiev, 11. Izzatilla Abdullaev, 22. Umar Adxamzoda, 25. Sarvar Soliev, 33. Tohirjon Shamsiddinov.
"Sho'rtan": 23. Akmal Rahimov, 2. Nurali Padarov, 4. Shahzod Abdivoyitov, 6. Elyor Omonjonov, 7. Bekzod Suvonov, 8. Jahongir Qurbonboev, 10. Islom Shodmonov, 14. Akrom Bahromov, 34. Shahboz Jo'raev, 66. Ahmed Qobiljonov, 77. Salohiddin Sanaqulov
Zaxira: 25. Asilbek Berdialiev, 11. Asadbek Samariddinov, 98. Sherbek Eshmurodov.

Bekzod Tolibov tayyorladi

Pro liga. "Neftchi" "Sho'rtan"ni mag'lub etdi (To'liq sharh)