Jahon chempionati-2021dagi ishtirokini nimchorak finalda Eronga qarshi 8:9 hisobidagi mag'lubiyat bilan yakunlagan jamoamiz Vilnyus - Istanbul - Toshkent yo'nalishi bo'ylab tun yarmidan oqqanda poytaxtimizga etib kelishdi.

FOTO JCH-2021. O'zbekiston futzal terma jamoasi Toshkentga qaytib keldi GALEREYA

Mundialda futzalchilarimiz muxlislar mehrini qozona olishdi. To'g'ri, biz unda bor yo'g'i bitta g'alabani qo'lga kiritdik. Lekin, Rossiya va Eron bilan o'yinlar, undagi mag'lubiyatlardan keyin ishqibozlar yigitlarni birdek olqishlashdi. Ular shunchalik munosib o'yin ko'rsatishdiki, hatto mag'lubiyatdan keyin ham olqish olishda davom etishmoqda.

Futzalchilarni kutib olish uchun Islom Karimov nomidagi Toshkent xalqaro aeroportiga ularning oila azolari, muxlislar va OAV vakillari chiqishdi. Bir qarashda hammasi ajoyibdek...

Lekin, negadir aeroportda O'FA rahbariyatidan faqatgina bosh kotib Avaz Maksumov bor edi. Bo'ldimi?

Futzalchilarimiz yurtimizdan uchib ketishayotganda ularni kuzatib qo'ygani hech kim chiqmagandi.

Lekin, Litvadagi o'yinlardan keyin kutib olishga boshqacha tayyorgarlik bo'lishini kutgandim. O'FA rahbariyati chiqishini, karnay-surnay va gullar bilan kutib olinishini kutgandim. Sababi, bu yigitlar amaldagi JCH finalchisi Rossiya va amaldagi bronza medallari sohibi Eron bilan tengma-teng o'yin ko'rsatib berishdi. Ular endi ko'pchilik uchun qadrlilarga aylanishdi. Ammo, o'sha qadrlilar kecha O'FA tomonidan qadrlanishmadi. Futzalchilar mundialdagi ishtirok uchun moddiy rag'batlantirilishi turgan gap. Ammo, aeroportda munosib kutib olish bu umuman boshqa narsa. Har qanday inson qilgan mehnatlari qadrlanishini ko'rishni xohlaydi. Delegaciyamizning har bir azosiga bir bog'lamdan gul va hech bo'lmaganda ikkitadan karnay-surnay qimmatga tushmasdi. Faqatgina bu narsaga etibor qaratish lozim edi xolos.

Jahon chempionatida 4ta o'yindan 3tasini yutqazganimiz rost, lekin izohlarda va ijtimoiy tarmoqlarda bildirilayotgan fikrlarga etibor qarating. Ularning 99 foizi ijobiy va yigitlarni olqishlovchi fikrlar. Shuncha mehr va olqishga o'z mehnati bilan erishganlarni chiroyli qilib kutib olish ham kerak edi. Terma jamoamiz vakillarining oila azolari, muxlislar va kutib olish uchun chiqqan barcha OAV vakillariga minnatdorchilik bildirib ketishni xohlardim.

Boshqa terma jamoalarimizni gullar va turli sovg'alar bilan kutib olishni qoyillatamiz. Futzalchilar ham shunday munosabatga munosib.

2019 yil Olmaliqning AGMK futzal jamoasi Bangkokda o'tkazilgan klublar o'rtasidagi Osiyo chempionatida to'rtinchi o'rinni olganidan keyin Toshkentga qaytib kelishganda klub rahbariyati ularni mana shunday tarzda kutib olgani chiqishgan. Yoqimli-a?!

Yaxshi ham aksar o'yinchilarni oila azolari gullar bilan kutib olishdi. Bo'lmasa kim gul berardi ularga?

Shunga qaramay, futzalchilarimiz eng muhim narsaga erisha olishdi - muxlislar mehri!

Qadrlanmagan qadrlilar