Biroq ushbu mavsum startida jamoa yig'inlarni to'liqligicha jamoa qarorgohida olib bordi va bu haqda oldinroq malum qilganimizdek, jamoa futbolchilari xorijda yig'in o'tkazmaydi.
Ko'rib turganimizdek, "Lokomotiv" oxirgi 2-3 yil davomida tarkibini yoshartirish ishlarini olib bordi, ammo har yilgi mavsumoldi matbuot anjumanlarida klub rasmiylari jamoaning oldiga qo'yilgan vazifa va maqsadlar o'zgarmaganligini malum qilishadi.
Futbol jamiyatiga ayonki, yosh futbolchini o'stirish, klubning darajasida shakllantirib, uni bosqichma-bosqich rivojlantirishda futbol maktablarining ahamiyati juda katta. O'z navbatida klubni moliyalashtirayotgan "O'zbekiston temir yo'llari" akciyadorlik jamiyati ham klubning futbol maktabini barpo etishda ko'maklashmoqda. Olgan malumotlarimizga qaraganda, "Lokomotiv" bugun futbol maktabi bunyod etishni boshlab yuborgan va bu 2022 yil oxiriga qadar foydalanishga topshirilishi kutilmoqda.
Bizga malum bo'lishicha, Yashnobod tumanida "Lokomotiv" futbol klubiga tegishli 2 gektar erga klub hamda "O'zbekiston temir yo'llari" AJ hamkorlikda bitta standart stadion hamda ikkita kichkina suniy maydon qurishni rejalashtirgan va qurilish ishlari boshlab yuborilgan. Biroq bu hali hammasi emas...
Bundan tashqari, "Lokomotiv" futbol klubiga Toshkent viloyatining Nazarbek shaharchasidan 8 gektar er ajratilgan bo'lib, klub u erga to'rtta standart maydon hamda yosh futbolchilarning yashashi uchun mehmonxona qurilishi reja qilmoqda. Shu orqali "Lokomotiv" klubi futbol maktabidagi barcha guruhlarni bir joyga jamlab, ularni kuzatish imkoniyatiga ega bo'ladi. Qayd etish kerak, "Lokomotiv"da hozirgi paytda ham futbol maktabi faoliyat olib bormoqda. Unda 10ga yaqin yosh toifalarida 800dan ziyod yosh futbolchilar futbol sir-asrorlarini o'rganishmoqda. Doimiy ravishda mamlakat chempionatlarida, xalqaro turnirlarda ishtirok etishmoqda. Ammo guruhlarning barchasi har xil joylarda mashg'ulotlar olib borishadi.
Qisqa qilib aytadigan bo'lsak, "Lokomotiv" futbol klubi qishda Turkiya yoki BAAga borgandan ko'ra, yosh futbolchilar uchun futbol maktabi qurishni maqul topdi.
Izohlar