O'yin haqida

- Bugungi o'yinni ko'rganingizdek shiddatli ko'rinishda o'tdi. Avvalgi so'zlarimni takrorlayman: oldida maqsadi bor jamoaga hakamlar yordami shart emas. Biz umidli va yosh futbolchilar bilan oldinga intilayotgan jamoamiz. Faqat toza o'yin namoyish etishni xohlardik. Bilmadim, yana hakamlarga osilish noto'g'ridir, lekin ko'pchilik ko'rgan bo'lishi mumkin, raqib qo'liga to'p tegsa, hakam penalti bermayapti. Bir emas, ikki-uch vaziyatlarda penalti belgilamadi. Gavda bilan o'yin namoyish etilgan 50 ga 50 vaziyatlarda bizning zararimizga fol qayd etilmoqda. Ustiga-ustak bitta kam o'ynadik. Ular buni his qilishmadi ham. Agar shu futbol bo'lsa, bilmadim... Hakamlar toza futbol qo'yib berishsa, boshqa hech qanday etirozimiz yo'q.

- Bugungi o'yinda 10 kishi bo'lib o'ynash qanchalik noqulaylik tug'dirdi?

- Kamchilik bo'lib o'ynash faqat bizga emas, barcha jamoaga qiyinchilik tug'diradi. 10 kishi bo'lish esa rejalarni buzib yuboradi. Shundan so'ng o'zgarishlar qilishga to'g'ri keldi. Shunday bo'lsa-da, shogirdlarimga minnatdorchilik bildiraman, chunki ular bor kuchi bilan o'ynadi. Hatto kamchilik qolganimizga raqibga sezdirmadi. Hisob o'yinga mos bo'lmadi. Raqibga nisbatan bizda ko'proq imkoniyat yuzaga keldi. O'yin so'ngida charchoq ham biroz pand berdi, negaki bir kishi ikki kishining ishni maydonda bajarishiga to'g'ri keldi.

- Ibrohim G'anixonov va murabbiylar shtabiga qizil kartochka ko'rsatilgan vaziyat qay tariqa boshlandi? Qo'pol so'zlar uchun ular chetlatildimi?

- Murabbiylar shtabidagilar nima deganini eshitganim yo'q. Balki chindan haqoratli so'zlarni ishlatgan bo'lsa, adolali ravishda chetlatilgandir. Lekin maydondagi futbolchiga ikkinchi sariq kartochka ko'rsatishga arzigulik vaziyat emasdi. O'yinda hakamga imkoniyat qoldirmaslik kerak. 2-3 ta gol ur, unga og'irlik tushmasin. Bu vaziyatni ko'rib chiqamiz.

- Uchrashuv kartochkalarga boy o'tdi. Bu futbolchilarning tartibsizligidanmi yoki boshqa sababi bormi?

- Tartib jihatdan desa noto'g'ri bo'ladi. 10 kishi o'ynayotgan jamoada hakamlar arzimagan vaziyatda ham to'pni raqibga olib beraversa, istalgan kishi quyushqondan chiqib ketadi. Shu bois, asablar jilovlanmagan bo'lsa kerak. Aslida, deyarli barcha sariq kartochka ko'rsatilgan vaziyatlar qarshimda yuz berdi, ogohlantirishga tortadigan o'yin bo'lgani yo'q. Hakamlar 100 % o'yin tizginini buzdi, hali bunga ular javob beradi. "Sho'rtan"ga hech qanday etirozim yo'q. Lekin hakamlar chiroyli futbolga xalaqit berdi.

Rashid G'ofurov: "Hakamlar 100% o'yin tizginini buzdi, hali bunga ular javob beradi"