"Олимпия", "Нурафшон", "Жиззах", "Жайхун" жамоалари Ўзбекистон кубоги саралаш баҳслари орқали йўлга отланишди. Биринчи лига мусобақаси эса апрель ойида старт олади. Клубларнинг ПФЛ рўйхатидан ўтказган қайдномаларига назар солар эканмиз, бир қатор тажрибали ва номдор футболчиларга кўзимиз тушди. Қуйида шу ҳақида батафсил тўхталамиз.

Санжар Рашидов - "Жиззах"

Рашидовларнинг Сардордан кейинги вакили Санжарни барча "Сўғдиёна"даги ўйинлари билан таниган. Ярим ҳимоячини 2021 йил "Бунёдкор"даги фаолиятидан сўнг уни кўздан қочириб қўйгандик. Қишда эса "Сурхон" йиғинида қатнашаётганлиги маълум бўлди. Афтидан термизликлар билан келишув амалга ошмади чоғи якунда Биринчи лига вакили "Жиззах"дан қўним топди. У яна аввалги формасига қайтиб ажойиб ўйинларини кўрсатишига тилакдошмиз. Маълумот учун, эндиликда Санжар Рашидов жамоаси билан Ўзбекистон кубоги гуруҳ босқичида иштирок этади. Саралашдан муваффақиятли ўтган клуб "А" гуруҳида ОКМК, "Андижон-SGS", "Ғиждувон" билан беллашади.

Суҳроб Неъматов - "Нурафшон"

Мен бу футболчини, ўйин услубини БАА терма жамоаси собиқ ярим ҳимоячиси Исмоил Матарга ўхшатардим. "Бухоро"да ўйнаб юрган кезларида жамоанинг сардори ва ҳақиқий етакчиси бўлган. Майдонда курашлардан қочмаган. Сўнгги мавсумларда у Про лигада "Бухоро"га кўмаклашишга ҳаракат қилди. Эндиликда "Нурафшон" Неъматовнинг тажрибасидан фойдаланиб кўради. Футболчи сўнгги бор 2020 йил "Бухоро" сафида Суперлигада ўйнаган эди.

Сардор Сулаймонов - "Нурафшон"

Сардор Сулаймоновни наманганлик мухлислар жуда яхши танишлари аниқ. 2018 йил "Навбаҳор"даги фаолиятида ёмон таассурот қолдирмаганди. Кейинчалик "Андижон", "Бухоро", "Сурхон"да тўп тепди. Суперлигада доимий тарзда ўйнаб келаётган Сардор Сулаймонов Қирғиз Республикасининг "Нефтчи", Бухоронинг "Ғиждувон" клубларида тўп тепди. У ҳам Суҳроб Неъматов билан "Нурафшон" сафини тўлдирди.

Қаҳрамон Баҳодиров - "Жиззах"

Яна бир Суперлига ҳавосини кўрган ярим ҳимоячининг ҳам фаолияти зинама-зина пастки лигаларга қараб кетмоқда. Қаҳрамон Баҳодиров Суперлигада "Андижон", ОКМК, "Машъал", "Бухоро" жамоаларида ҳаракат қилган. Ўтган йили Про лигада "Янгиер"да ўйнади. 34 ёшли футболчи бу мавсумни Биринчи лигада "Жиззах"да ўтказади.

Бундан ташқари "Цементчи" ҳам таркибни Ҳамидулло Абдуҳамидов, Шодиёр Хожиматов, Миржамол Неъматов, Исломбек Каримов каби футболчилар билан кучайтира олди. "Чиғатой" сафида ўз вақтида Сергей Лушчаннинг "Бунёдкор"даги "қалдирғочи" бўлган Давронбек Умиров рўйхатдан ўтган. Футболчи "Бунёдкор"дан ташқари элитада "Турон", "Локомотив", "Металлург", "Сўғдиёна" жамоаларининг либосларида майдонга тушган.

"Қумқўрғон"да эса "Насаф" ва "Шўртан"даги ўйинлари орқали таниш Лазиз Убайдуллаев ҳам борлигини кўришимиз мумкин. У 2022 йилда ҳам шу жамоа шарафини ҳимоя қилган. Қуйи лигаларда ҳам шундай номларнинг борлиги яхши ҳолат. Бу биринчидан футбол жамоатчилигининг эътиборини жалб қилса, иккинчидан рақобатнинг ошишига хизмат қилади.

Биринчи лига. Рашидов, Сулаймонов ёхуд Суперлигадан "синалган" суперфутболчилар