- Yarim finaldan so'ng, “Nasaf” uchun mavsum yakunlandi. Bugungi uchrashuv va mavsum haqida fikrlaringiz qanday?

- O'ylashimcha, mavsum biz uchun omadli keldi. Chunki, asosiy vazifa o'rin egallashimiz kerak edi va yigitlar buni uddaladi. Shu tufayli “Nasaf” muxlislari bu jamoa bilan faxrlansa bo'ladi, deb aytmoqchiman. Bugungi o'yinga kelsak, bahsni juda yomon boshladik. Bu haqda takidlagandim, 20-25 daqiqa davomida AGMKda tashabbus bo'lishini bilgandim. Biz yaxshi himoyalib, gol o'tkazmasligimiz kerak edi, lekin, bu amalga oshmadi. Qolgan 60-70 daqiqada to'liq ustunligimizni namoyish etdik. Ammo, bilasiz futbolda gol urish kerak, gol urilmasangiz mag'lubiyatga uchraysiz. Menimcha, o'yinda ustunlik qildik, lekin bugun mag'lub bo'ldik. AGMKni bugungi g'alaba bilan tabriklayman va ularga keyingi o'yinda omad tilayman.

- Finalda qatorasiga 3 yil AGMK – “Paxtakor” o'zaro to'qnash keladi. Bu bahs haqida nima deya olasiz?

- Agar AGMK bugungidek o'ynaydigan bo'lsa, jamoada hech qanday imkoniyat yo'q. Bu shaxsiy fikrim.

- “Nasaf”da moliyaviy qiyinchiliklar haqida ko'p bor aytildi. Hozir yil oxiri, qarzdorlik masalasi bajarildimi?

- Yo'q bu narsa bajarilgani yo'q. Bazi joylarda, bilmadim bu malumotlarni kim tarqatmoqda, “to'liq qutildi”, “futbolchilarning oldida qarzdorlik yo'q”, deb berishdi. Biroq, qarzdorlik hali bor.

- “Nasaf”da Kubokda yarim finalga etib keldi va chempionatni ham 2-o'rinda yakunladi. Buni rag'batlantirish uchun avtomobil yoki mukofot vada qilinganmidi? Ko'pchilik shu bilan qiziqmoqda.

- Bu haqda Namangandagi o'yin oldidan qaerdadir yozishdi. Biroq, Namangandagi uchrashuvdan oldin va keyin ham klub rahbarlari bilan uchrashmadik hamda bu haqda gap ham bo'lgani yo'q.

Agar “syurpriz” bo'ladigan bo'lsa, bundan yigitlar xabar topishi kerak edi, ozgina motivaciya bo'lishi uchun. Lekin, bu haqda bizga hech kim aytmagan.

- Kelasi mavsum rejalari qanday? Eshitishimizga ko'ra, bir, ikki futbolchi jamoani tark etmoqda.

- Men ham bu haqda eshityapman. Shartnomasi tugagan futbolchilar bor, buni vaqt ko'rsatadi. Reja to'g'risida ham rahbariyat bilan o'tirib, muhokama qilganimizcha yo'q, deya so'zlarini yakunladi Berdiev.

Ro'ziqul Berdiev: “Bizga hech qanday “syurpriz” vada qilinmagandi”