- Ўйин ҳақида фикрингиз?

- Аутсайдер жамоалар билан ўйнаганда руҳий тайёргарлик етарлича бўлмайди. Бу ҳақда кўп марта гапирганимиз билан футболчиларнинг ҳам ўйинга ўз руҳий қараши бор. Бу ҳолат биринчи бўлимда яққол кўзга ташланди. "Шўртан" 5-4-1 тактикаси билан ҳимояланганда бизга рақиб ҳимоясини ёриб ўтиш осон бўлмади. Лекин охиригача сабр қилиб биринчи голни уриб олдик. Шундан кейин устунлик тўлиқ жамоамиз томонга ўтиб керакли ғалабани қўлга киритдик.

- Жавоҳир Сидиқов билан Ойбек Бозоровнинг майдонга тушмагани сабаби нимада?

- Қанотларда тезкор ўйинчилардан фойдаланишни мақсад қилгандик. Ойбек Бозоров Фарғонадаги баҳсда жароҳат олди, Жавоҳирда ҳам кичик жароҳат бор.

- Янги легионерлар ҳақида нима дея оласиз?

- Жамоамизга яқинда қўшилган хорижлик футболчимиз икки кун умумжамоа билан шуғулланди. Ҳолати ёмон эмас, фақат ўйин амалиёти камлиги учун секин-аста оптимал ҳолатга чиқаришга ҳаракат қиламиз.

- Игорь Голбан 85-дақиқада майдонга тушди.

- Ўйин охирларида узун тўп оширишлар билан ўйнашга ўтилди. Қолаверса Голбан бош билан яхши ўйнагани учун ҳам фойдаси тегишини билиб майдонга туширдик.

- "Насаф"нинг Суперлигадаги рақиблари жонланиб анча яқинлашиб қолди. Буёқда қийин ўйинлар, шу билан бирга Элит Осиё чемпионлар лигаси борлигини ҳисобга олиб "Насаф" чемпионликни қўлдан бой бериб қўймасмикин деган қўрқув йўқми?

- Биз хотиржаммиз. Имкон қадар биринчи ўриндан тушмасликка ҳаракат қиламиз. Мақсадимиз титулни ўзимизда сақлаб қолиш. Тўғри, очколар йўқотдик, лекин ўйин томонлама ҳар икки таъқибчимиздан яхши эканимизни кўрсата олдик. Ҳали олдинда муҳим беллашувлар кутяпти, Осиёнинг энг яхши жамоалари билан ўйнаймиз ва бу баҳсларда ҳам ўзимизни кўрсатишга ҳаракат қиламиз.

- Олдинда "Сурхон"га қарши жиддий ўйин кутмоқда.

- Биз ҳар бир учрашувга жиддий ёндашамиз. Рақибларимиз кучли. Термиздан ҳам яхши натижа билан қайтишга ҳаракат қиламиз. Кейинчалик йўқотилган ҳар бир очко қимматга тушиши мумкин. Буни ҳам ҳисобга олиш даркор.

- Нима деб ўйлайсиз, жамоага инсон руҳияти билан ишлайдиган психолог ёки шунга ўхшаш касб эгаларини жалб этиш керакми?

- Футболда авваламбор бош мураббийнинг ўзи руҳшунос бўлиши керак деган гап бор. Чунки ўйинчиларни мураббий тайёрлайди ва ўз фикрини руҳан футболчилар миясига сингдиришга ҳаракат қилади. Лекин баъзан қанчалик уқтирманг, футболчилар ичидан рақиб кучсиз деган хаёл ўтади. Ҳозирча ҳеч бир жамоада психолог мураббийни кўрмадим, шу боис керакми-йўқми аниқ бир нарса дея олмайман.

Рўзиқул Бердиев: "Мақсадимиз чемпионликни ўзимизда сақлаб қолиш"