- O'yin haqida fikringiz?

- O'yin haqida alohida to'xtalmoqchi emasman, lekin oldingi uchrashuvlarda bo'lgani kabi ochko yig'ishda davom etyapmiz. Hozir eng muhimi shu. Futbolda o'yin esdan chiqadi, lekin natija qoladi. Qisqacha gapiradigan bo'lsam, "Xorazm" bizga yaxshigina qarshilik ko'rsatdi, ular kuch bor paytda vaziyatlar ham yaratishdi. Ikkinchi bo'limda raqib toliqib qolgach, ustunlik biz tomonga o'tdi va gol urib navbatdagi g'alabaga erishdik. Ushbu g'alaba bilan barcha muxlislarimizni tabriklayman.

- Bugungi bahsda ikki nafar legioner zaxiraga olindi. Bu nima bilan bog'liq?

- Chunki bu o'yinchilarimizning yordami kam bo'ldi, shu bois zaxiraga olishga qaror qildik. Hujumga etibor qaratishimiz kerak edi, shuning uchun boshqa o'yinchilarni maydonga tushirdik.

- Umar Eshmurodov bahs oxirlarida maydonga tushdi.

- Umar ko'p uchrashuvlarda asosiy tarkibda tushib to'liq harakat qilib kelmoqda. Bugun esa unga dam berishga qaror qilgandik. Lekin o'yin borishidan kelib chiqqan holda zaxiradan maydonga tushirdik.

- Yangi kelgan legionerlar nima uchundir jamoaga qo'shilib keta olmayapti.

- "Nasaf" - katta klub va birdaniga yangi o'yinchilarning qo'shilib ketishi oson bo'lmaydi. Shu jumladan, legionerlar ham. Klubga kelgan har bir futbolchi avvalo jamoaga moslashish jarayonini o'z boshidan kechiradi.

- "Al Hilol" bilan o'yinga tayyorgarlik qanday ketyapti?

- Avvalo barcha ishqibozlarni shu o'yinga taklif etib qolaman. "Al Hilol" - Osiyoning eng yaxshi jamoalaridan biri. Jamoa bilan birga yulduzlar ham Qarshiga keladi. Natija qanday bo'lishini bilmadim-u, lekin yigitlarni astoydil tayyorlaymiz. Ham ruhiy, ham jismoniy tarafdan. Birinchi navbatda jismonan tayyor bo'lishimiz kerak.

Shu bahsda 12-o'yinchi bilan harakat qilishni juda xohlaymiz. Yani, muxlislarimiz oxirigacha qo'llab tursa, biz ham bo'shashmaymiz. Ishqibozlar stadionga kela olmagan taqdirda ijtimoiy tarmoqlar orqali qo'llab turishsa bundan ham xursand bo'lamiz. Ayni paytda bizga ruhiy dalda nihoyatda zarur. Shundagina birgalashib kuchli raqibga qarshi kurash olib boramiz.

- Dragan Cheran oxirgi o'yinlarda og'ir ko'rinyapti.

- Cheran - tajribali futbolchi, u "Qizilqum" bilan kechgan bahsda oxirigacha kurashdi. Lekin baribir bu yoshda jismoniy holat pand beradi. Buni to'g'ri qabul qilish kerak. Ammo vaziyat yaratishda va hujumlarni boshlashda faolligi bilan ajralib turibdi. Bir so'z bilan aytganda, uning jamoamizga foydasi tegyapti.

Ro'ziqul Berdiev: "Raqib toliqib qolgach, ustunlik biz tomonga o'tdi va gol urib g'alabaga erishdik"