20 may kuni O'zbekiston olimpiya terma jamoasi, hech qaerga yo'llanma bermaydigan, shunchaki OFK yo'qolib qolishi mumkin bo'lgan avlod vakillarini saqlab qolish uchun har 2 yilda bir marotaba o'tkazadigan 23 yoshli futbolchilar o'rtasidagi Osiyo chempionatiga tayyorgarlikni boshlaydi. 23 yoshli futbolchilar o'rtasidagi Osiyo chempionatining bittasi Olimpiada yo'llanmasini bersa, ikkinchisi shunchaki o'tkazilinadi. Bu safar Toshkent mezbonligidagi qita chempionati bilan biz hech qanday musobaqaga yo'l olmaymiz.

1 iyun kuni start oladigan musobaqaga Timur Kapadze 10 kun qolganda yig'in boshlaydi. Mashg'ulotlarga 30 nafar futbolchi chaqirilgan. Odatiy hol, to'g'rimi? Bir qarashdan shunday. "Olimpik"ni keyingi ikkita o'yini qoldirildi, hech qanday muammo yo'q. Ammo shundoq ham jismoniy tarafdan qiyin holatga tushib qolgan "Paxtakor" va "Nasaf" keyingi ikki turni OTJga chaqirilgan futbolchilarisiz o'tkazishi kerak. Ketma-ket ochkolarni boy berayotgan "sherlar" o'z o'rnini topib borayotgan "Lokomotiv" va medallar uchun kurashayotgan "So'g'diyona"ga qarshi maydonga chiqsa, "Nasaf" yaqinda o'zgarish bo'lgan "Bunyodkor" va "Dinamo"ga qarshi safarga chiqadi.

Ko'p cho'zilmasdan asosiy mavzuga qaytaman. So'nggi 20 yil davomida chempionatdan MTJ va OTJning manfaati ustun qo'yilishi natijasida, bugungi avlod tarixdagi eng zerikarli o'yinlarni (chempionat intrigasi jadvalda qiziq faqat) ko'rishga mahkum qilindilar. Cho'zilib yotgan futbolchilar-u, maza-matrasi yo'q o'yinlar to'plamini biz bugun chempionat deb atayapmiz. Yillar davomida bosh musobaqamizni MTJni deb, istasak 20 kunga, istasak 1 oyga to'xtatib qo'yaverdik. Yakunda nima bo'ldi, na JCHga chiqmadik, na Olimpiadaga. Amalda bu o'zining salbiy isbotini ko'rsatib berayotgan bo'lsada, bu safar o'xshaydi qabilada 2022 yilga etib keldik.

Keling dahshatli malumotlarni o'z ichiga olgan statistikani Sizlarga taqdim etaman. Oldimizdagi ikki musobaqa tufayli PFL 1 davra o'yinlarini tezroq tugatib olish uchun chempionatdagi o'yinlar orasini 5 kun qilib qo'ydi. Ularni ham tushunamiz. Ko'chirishlardan o'zini shunday sug'urtalamasa boshqa yo'li qolmagandi. Endi INSON deb atalmish futbolchilar chekayotgan jabrni ko'zingiz bilan ko'ring.

Bu vaziyatdan jabr chekadigan 3ta jamoaning taqvimiga nazar tashlagan holda, "Kichkina tabib"dagi Mashrab kabi gapira olmayotgan murabbiy va futbolchilar o'rniga tilga kirishga harakat qilaman. Keling, avval Ro'ziqul Berdievning "dardini" eshitamiz. "Nasaf" mavsum boshidan beri o'tazgan o'yinlari. Bu erga biz OCHLga chiqishdagi saralash o'yinlarini qo'shmadik. Avvaliga OTJni deb jabr chekayotgan Berdievning olimpia yoshidagi futbolchilari ko'tarayotgan yuklamaga nazar:

OTJ safidan o'rin olib kelayotgan "Nasaf" futbolchilari 2022 yilda.
3 mart. Navbahor - Nasaf
9 mart. Nasaf - Metallurg
23 mart. O'zbekiston U 23 - Saudiya Arabistoni (Dubay)
26 mart. O'zbekiston U 23 - BAA (Dubay)
30 mart. O'zbekiston U 23 - Vetnam (Dubay)
2 aprel. Lokomotiv - Nasaf
8 aprel. Al Sadd - Nasaf
11 aprel. Nasaf - Al Vixdat
15 aprel. Nasaf - Al Faysali
19 aprel. Al Faysali - Nasaf
23 aprel. Nasaf - Al Sadd
27 aprel. Al Vixdat - Nasaf
2 may. Qo'qon-1912 - Nasaf
7 may. Nasaf - Paxtakor
12 may. So'g'diyona - Nasaf
17 may. Nasaf - Qizilqum
24 may. Bunyodkor - Nasaf
28 may. Dinamo - Nasaf
1 iyun. O'zbekiston U-23 - Turkmaniston
4 iyun. O'zbekiston U-23 - Qatar
7 iyun. O'zbekiston U-23 - Eron
11 iyun. O'zbekiston U-23. 1/4 final
15 iyun. O'zbekiston U-23. 1/2 final
18/19 iyun. O'zbekiston U-23. Medallar uchun
22 iyun. Neftchi - Nasaf
26 iyun. AGMK - Nasaf
30 iyun. Nasaf - Olimpik
04 iyul. Nasaf - Surxon

Jami: 123 kun ichida 28tagacha o'yin. O'rtacha farq 4.4. Deyarli har 4 kunda bitta o'yin. O'rtada ikkita chet elga safar va 3ta xalqaro musobaqa (BAA Kubogi, OCHL va Osiyo chempionati saralashi). Bu O'zbekiston U-23 terma jamoasini chorak finaldan o'tgan taqdirdagi statistikasi.

Endi esa o'zimizning murabbiylarning ish uslubiga o'tib, keti uzilmas yig'inlarni tashkil qilishga o'rganib olgan Katanec "Nasaf"ni qanchalik qiynayotganligini ko'ramiz. Etibor bergan bo'lsangiz, Katanecni deyarli stadionlarda ko'rmay qo'yganmiz. Shu fursatdan foydalanib savol bersak, Katanecning shartnomasida Superliga o'yinlarini ko'rish yozilganmi?

MTJ safidan o'rin olib kelayotgan "Nasaf" futbolchilari 2022 yilda.
3 mart. Navbahor - Nasaf
9 mart. Nasaf - Metallurg
25 mart. O'zbekiston - Qirg'iziston
29 mart. O'zbekiston - Uganda
2 aprel. Lokomotiv - Nasaf
8 aprel. Al Sadd - Nasaf
11 aprel. Nasaf - Al Vixdat
15 aprel. Nasaf - Al Faysali
19 aprel. Al Faysali - Nasaf
23 aprel. Nasaf - Al Sadd
27 aprel. Al Vixdat - Nasaf
2 may. Qo'qon-1912 - Nasaf
7 may. Nasaf - Paxtakor
12 may. So'g'diyona - Nasaf
17 may. Nasaf - Qizilqum
24 may. Bunyodkor - Nasaf
28 may. Dinamo - Nasaf
8 iyun. O'zbekiston MTJ
11 iyun. O'zbekiston MTJ
14 iyun. O'zbekiston MTJ
22 iyun. Neftchi - Nasaf
26 iyun. AGMK - Nasaf
30 iyun. Nasaf - Olimpik
04 iyul. Nasaf - Surxon

Jami: 123 kun ichida 24tagacha o'yin. O'rtacha farq 5.1. Deyarli har 5 kunda bitta o'yin. O'rtada ikkita chet el safari va 3ta xalqaro musobaqa (Navro'z Kubogi, OCHL va Osiyo Kubogi saralashi).

Sherzod Nasrullaevning jarohati ham og'ir o'yinlar taqvimi natijasi deb aytsa bo'ladi. Bu ketishda, 3ta klub, "Paxtakor", "Nasaf" va "Olimpik" kuzga kelib aniq jarohatlar iskanjasiga tushadi.

Tanqidlar iskanjasida qolib ketgan "Paxtakor"ning makedoniyalik murabbiyini birov eshitmaydi. Mana shunday payt unga Ro'ziqul Berdiev bilan "pik-nik"ka chiqib, dardlashib olishni tavsiya qilardim.

OTJ safidan o'rin olib kelayotgan "Paxtakor" futbolchilari 2022 yilda.
3 mart. Dinamo - Paxtakor
10 mart. Paxtakor - Neftchi
16 mart. Olimpik - Paxtakor
23 mart. O'zbekiston U 23 - Saudiya Arabistoni (Dubay)
26 mart. O'zbekiston U 23 - BAA (Dubay)
30 mart. O'zbekiston U 23 - Vetnam (Dubay)
1 aprel. Paxtakor - Navbahor
7 aprel. Paxtakor - Sepaxon
10 aprel. Al Tavun - Paxtakor
14 aprel. Al Duxayl - Paxtakor
18 aprel. Paxtakor - Al Duxayl
22 aprel. Sepaxon - Paxtakor
26 aprel. Paxtakor - Al Tavon
2 may. Paxtakor - AGMK
7 may. Nasaf - Paxtakor
12 may. Paxtakor - Surxon
18 may. Qo'qon-1912 - Paxtakor
23 may. Lokomotiv - Paxtakor
28 may. So'g'diyona - Paxtakor
1 iyun. O'zbekiston U-23 - Turkmaniston
4 iyun. O'zbekiston U-23 - Qatar
7 iyun. O'zbekiston U-23 - Eron
11 iyun. O'zbekiston U-23. 1/4 final
15 iyun. O'zbekiston U-23. 1/2 final
18/19 iyun. O'zbekiston U-23. Medallar uchun
20 iyun. Qizilqum - Paxtakor
29 iyun. Paxtakor - Bunyodkor
04 iyul. Metallurg - Paxtakor

Jami: 123 kun ichida 26tagacha o'yin. O'rtacha farq 4.3. Deyarli har 4 kunda bitta o'yin. O'rtada ikkita chet el safari va 3ta xalqaro musobaqa (BAA Kubogi, OCHL va Osiyo chempionati saralashi).

MTJ safidan o'rin olib kelayotgan "Paxtakor" futbolchilari 2022 yilda.
3 mart. Dinamo - Paxtakor
10 mart. Paxtakor - Neftchi
16 mart. Olimpik - Paxtakor
25 mart. O'zbekiston - Qirg'iziston
29 mart. O'zbekiston - Uganda
1 aprel. Paxtakor - Navbahor
7 aprel. Paxtakor - Sepaxon
10 aprel. Al Tavun - Paxtakor
14 aprel. Al Duxayl - Paxtakor
18 aprel. Paxtakor - Al Duxayl
22 aprel. Sepaxon - Paxtakor
26 aprel. Paxtakor - Al Tavon
2 may. Paxtakor - AGMK
7 may. Nasaf - Paxtakor
12 may. Paxtakor - Surxon
18 may. Qo'qon-1912 - Paxtakor
23 may. Lokomotiv - Paxtakor
28 may. So'g'diyona - Paxtakor
8 iyun. O'zbekiston MTJ
11 iyun. O'zbekiston MTJ
14 iyun. O'zbekiston MTJ
20 iyun. Qizilqum - Paxtakor
29 iyun. Paxtakor - Bunyodkor
04 iyul. Metallurg - Paxtakor

Jami: 123 kun ichida 25tagacha o'yin. O'rtacha farq 4.9. Deyarli har 5 kunda bitta o'yin. O'rtada ikkita chet el safari va 3ta xalqaro musobaqa (Navro'z Kubogi, OCHL va Osiyo Kubogi saralashi).

"Olimpik"ni bolalari ham o'z holatlari bilan maqtana olmaydi.

OTJ safidan o'rin olib kelayotgan "Olimpik" futbolchilari 2022 yilda.
2 mart. Olimpik - Surxon
9 mart. Qo'qon - 1912 - Olimpik
16 mart. Olimpik - Paxtakor
23 mart. O'zbekiston U 23 - Saudiya Arabistoni (Dubay)
26 mart. O'zbekiston U 23 - BAA (Dubay)
30 mart. O'zbekiston U 23 - Vetnam (Dubay)
2 aprel. So'g'diyona - Olimpik
9 aprel. Andijon-2 - Olimpik
14 aprel. Olimpik - Turon
21 aprel. Sho'rtan - Olimpik
26 aprel. Olimpik - Qizilqum
30 aprel. Bunyodkor - Olimpik
5 may. Olimpik - Dinamo
10 may. Neftchi - Olimpik
16 may. Olimpik - Lokomotiv
20-31 may tayyorgarlik
1 iyun. O'zbekiston U-23 - Turkmaniston
4 iyun. O'zbekiston U-23 - Qatar
7 iyun. O'zbekiston U-23 - Eron
11 iyun. O'zbekiston U-23. 1/4 final
15 iyun. O'zbekiston U-23. 1/2 final
18/19 iyun. O'zbekiston U-23. Medallar uchun
22 iyun. Olimpik - AGMK
26 iyun. Metallurg - Olimpik
30 iyun. Nasaf - Olimpik
05 iyul. Olimpik - Navbahor

Jami: 125 kun ichida 26tagacha o'yin. O'rtacha farq 4.8. 5 kunga ham bormayapti, 5 kun! Bu hali hammasi emas! "Olimpik" sharafini Superligada himoya qilayotgan futbolchilarning aksariyati o'yinning ertasiga U-21 ligasida ham maydonga tushyaptilar. Axir ular robot emasku, 21 yoshli organizmni sochib yuborishmi maqsad, Olimpiadaga chiqaman deb? Ularning Olimpiadadan keyingi taqdiri bilan qiziqib ko'ryapsizlarmi. O'zingiz 40 kunda 12ta o'yin o'ynang, Olimpiadaga borasiz, faqat Paralimpiyaga!

Osiyo chempionatida yarim finalga chiqadigan bo'lsak, "Nasaf" va "Paxtakor" futbolchilari 20 iyun kuni o'z klubiga qaytadi. Aqli joyida bo'lgan murabbiy 30 kun yig'in va musobaqadan qaytgan futbolchisini mashg'ulotga qo'ymaydi, aks holda inson deb atalmish futbolchini "INVALID" qiladi, qo'yadi. Shuning uchun "Nasaf" va "Paxtakor" keyingi turlarda bu futbolchilarning xizmatidan foydalana olmaydi.

Siz o'ylaysiz boshqa klublar yoshlarga imkon berishni istamaydimi, istaydi. Lekin istaganlar yuqoridagi 2 klub kabi qiynalishini ko'rib, shartidan qaytadi. Bular orasida "Bunyodkor" ham bor. O'z paytida Igor Shkviring AGMK safini yoshlarga to'ldirib tashladi, ammo uni 2012 yilgi Olimpiada o'yinlari bahonasida o'tkazilavergan yig'inlar tinkasini quritdi, bu erda natija orqaga qarab keta boshladi. Natijada u nima qildi? Yo'li oddiy, yoshlardan voz kechdi qo'ydi, o'shanda biz na Olimpiadaga chiqdik, na bu futbolchilarning bittasi hech bo'lmasa Rossiyaga ketmadi.

Yuqoridagi futbolchilarni ham mana shu taqdir kutib turibdi. 4 oyda 30ta o'yin o'ynab bo'lmaydi (Angliyadagi "boxing day" ham nari borsa 3 hafta davom etadi), bizda futbolchilarni tayorlashda supertexnologiyalardan foydalanilmaydi, hammasi makaron sho'rva bilan boshlanadi. Bu organizm bir kun kelib sinadi. Kecha "Paxtakor" stadionidagi evropaliklarni ko'rdingizmi? Bizdagi yarim tarkib qo'shimcha qorin bilan yugurgan bo'lsa, 56 yoshli futbolchi to'p tepgan Italiya yulduzlarining deyarli hech birida ortiqcha vazn yo'q edi.

Maqola cho'zilib ketmasin, shunchaki futbolchilarga rahm qiling, ertaga ularning ro'zg'orini Siz qilib bermaysiz!

FIFA kunlari degan reglament bor, uni hali hech kim man qilmadi. Chempionatni kuchaytirib olmaguncha, hech bir terma jamoani rivojlantirib bo'lmasligini birgalikda tushuntiring, nima bo'lsa, nimaga yozmaysizlar deb o'tirmasdan! O'FAga keling, PFLga keling. "Smetani" hisoblab uyda o'tiravermay, fikr bering, taklif bering, buning uchun jinoiy javobgarlik yo'q.

Ro'ziqul Berdiev va Slavcha Voyneskining O'FAga "ayta olmayotgan" gaplari!