"Navbahor" vingeri Ruslan Jiyanov ham mazkur musobaqada terma jamoa tarkibida o'ynab, milliy jamoa muvaffaqiyatiga munosib hissa qo'shdi. Namanganliklar matbuot xizmati Jiyanovdan musobaqadan olgan taassurotlari borasida intervyu oldi.

- Ruslan, suhbatimiz avvalida CAFA turniridagi zafar bilan tabriklaymiz. Musobaqa taassurotlari borasidagi fikrlaringiz bilan o'rtoqlashsangiz...

- Tabrik uchun rahmat. Terma jamoamizning g'alabasi barcha hamyurtlarimizga qutlug' bo'lsin. Albatta, CAFA musobaqasi ko'tarinki ruhda o'tdi. Allohga shukrki, kubokni qo'lga kiritib, o'z oldimizga qo'yilgan maqsadga erishdik.

- Turnir davomidagi eng qiyin uchrashuv qaysi terma jamoaga qarshi kechgan o'yin bo'ldi?

- Turnirdagi barcha bellashuvlar keskin va murosasiz ruhda kechdi. Lekin o'yinlar ichida eng qiyinini tanlash kerak bo'lsa, shubhasiz, Eron termasiga qarshi kechgan final bahsini aytgan bo'lardim. Eronliklar bir kishi kam bo'lib qolganidan keyin hisobni ushlab qolish uchun o'ynab, himoyani mustahkamladi. Bu esa bizga qiyinchilik tug'dirdi. Allohga shukr, yakunda xalqimiz va yurtboshimiz oldida yuzimiz yorug' bo'lib, g'alaba qozonishga muvaffaq bo'ldik.

- Musobaqa g'olibiga aylanganingizda muhtaram Prezidentimiz stadionga tashrif buyurib, futbolchilarni tabrikladilar hamda kubokni o'z qo'llari bilan futbolchilarga topshirdilar. Bu voqelik, yani yurtboshimizning stadionlarga tashrifi qisqa vaqt ichida ikkinchi marta sodir bo'lmoqda. Bu nafaqat yurtimiz futboli, balki, jahon futboli tarixida ham deyarli kuzatilmaydigan hodisa. Ayting-chi, Prezidentimiz tomonlaridan futbolchilarga bo'lgan ushbu ulkan etibor sizlarga qanchalik motivaciya berdi?

- Albatta, yurtboshimiz tomonidan bo'ladigan etibor har doim kim bo'lishidan qatiy nazar insonga o'zgacha his-tuyg'ularni taqdim etadi. Muhtaram Prezidentimizning ishonchlari bizga katta ruh va kuch berdi. Stadionga tashrif buyurib, muvaffaqiyatni biz bilan birga nishonlaganliklari esa biz – futbolchilarga yanada ko'proq motivaciya beradi. Mamlakatimiz futbolida erishilayotgan yutuqlar zamirida albatta yurtboshimizning millionlar o'yiniga bo'lgan ulkan etiborlari samarasi yotibdi.

Fursatdan foydalanib, futbolga berayotgan ulkan etiborlari va yaratib berilayotgan alo darajadagi sharoitlar uchun barcha futbolchilar nomidan muhtaram Prezidentimizga o'z minnatdorchiligimni bildiraman.

- JCH-2026ga qadar milliy terma jamoamiz ko'plab yig'inlar uyushtiradi. Mundial startini qanchalik kutyapsiz? Jahon chempionatiga qadar sodir bo'layotgan qalb kechinmalari, his-tuyg'ular bilan o'rtoqlashsangiz...

- Mundial umuman boshqa daraja. JCHda ishtirok etish har bir futbolchining orzusi. Barcha qatori men buni ham intiqlik bilan kutyapman.

- Siz yurtimiz tarixida ilk marta Olimpiada va mundial yo'llanmasini qo'lga kiritgan terma jamoalar futbolchisiz. Bu sizga qanday hissiyotlarni hadya etmoqda?

- Bu endi umuman boshqa narsa. Mazkur tuyg'uni so'z bilan ifodalay olmayman. Allohga shukr, uyda ota-onam, tog'am ham bolaligimda Olimpiada va JCH yo'llanmasini qo'lga kiritadigan terma jamoa safida o'ynash nasib etsin, deb duo qilishardi hamda bu haqda ko'p gapirishardi. Qolaversa, sinfdoshlarim bilan ham ko'p hazillashardim va terma jamoamiz men o'ynagan davrda Olimpiadada ham, mundialda ham ishtirok etadi, derdim. Niyatlarim xolis ekan, orzularim birma-bir ro'yobga chiqmoqda. Buning uchun Allohga shukr deyman. Alloh taolodan nima so'rasangiz, shuni beradi. Shuning uchun niyatni katta qilish kerak ekan. Kelasi yilgi JCHda ham katta natijalarga erishish ijobat bo'lishiga ishonchim bor.

- Milliy terma jamoamiz bosh murabbiyi Timur Kapadze borasida nima deya olasiz?

- Timur aka bilan ko'p yillar javomida birga faoliyat yuritganmiz, juda ham kuchli mutaxassis. Timur Toxirovich boshqaruvida yurtimiz futboli tarixida ilk marta Olimpiada va JCH yo'llanmasini qo'lga kiritdik. Timur akaning qo'l ostida futbol o'ynash oson. U har bir o'yinchining ko'ngliga yo'l topa oladi.

- Muxlislarga tilaklaringiz...

- Ishqibozlarning borlariga shukr, ularning duolari va qo'llab- quvvatlashlari bilan tarixiy natijalarga birma-bir erishmoqdamiz. Muxlislar doimo bizni qo'llashdan charchamasin, biz esa ularni xursand qilish uchun maydonda barcha imkoniyatimizni ishga solamiz.

Ruslan Jiyanov: "Ota-onam va tog'am Olimpiada va JCH yo'llanmasini qo'lga kiritadigan terma jamoa safida o'ynash nasib etsin, deb duo qilishardi"