"Терма жамоанинг ҳар галги йиғинига ташриф буюраётганимизда албатта хурсанд бўламиз. Анчадан бери кўрмаган ўртоқларимиз билан кўришдик, улар билан дийдорлашамиз. Доимгидек терма жамоада муҳит аъло даражада. Энди барча диққат-эътиборимиз Жаҳон чемпионатининг иккинчи саралаш босқичига қаратилади. Худо хоҳласа ушбу босқичдан ўтиб олсак, яна ўз йўналишимизда давом этамиз. Ҳозирги асосий мақсадимиз аввало гуруҳда биринчи ўринни қўлга киритиш. Барча-барчанинг истаги ва орзуси бу мундиалга йўл олиш. Юракдан ва чин дилдан ҳаракат қилса, ушбу маррани забт этса бўлади. Олдимизда турган ҳар иккала ўйинда керакли натижаларни қўлга киритишимиз лозим. Яқинда оила қурдим ва янги ҳаётга қадам қўйдим. Ҳар доим ҳаётда янги воқеалар, янги режалар бўлади. Худога шукур уйланиб олдим. Энди бўйнимдаги масъулият янада ортади ва буни ҳис этиб турибман. Терма жамоамиз билан Эрон ва КХДРга қарши ўйинларда 100 фоизлик натижани қайд этиб, мухлисларни хурсанд этиш ва кейинги ўйинларга ҳам пухта тайёргарлик кўриш", - дея фикрларини билдириб ўтди Санжар Турсунов.

Клубдаги фаолияти ҳақида:

- Ўйлашимча, кейинги мавсумни ҳам "Ворскла" жамоаси сафида ўтказсам керак. Ҳозирги кунда бу нарса 95 фоизга ҳал бўлиб турибди. Кейинги мавсумдан эътиборан Европа лигасида иштирок этамиз. Ушбу ой сўнггида клубга бориб қўшиламан ва барча масала ўшанда узил-кесил ҳал бўлади. Айни пайтда эса бу ҳақида ўйлаётганим йўқ. Чунки бор эътиборим терма жамоа иштирокидаги ўйинларга қаратилган.

Шаҳбоз Беғамов суҳбатлашди.

Санжар Турсунов: "Юракдан ва чин дилдан ҳаракат қилса, мундиал чиптасини қўлга киритиш мумкин"