Aniqroq aytsak, yomon o'yin biz uchun yaxshi natija bilan tugadi. Uchrashuvning eng yaxshi o'yinchisi, shubhasiz, bellashuv taqdirini hal qilgan Igor Sergeev bo'ldi. Zaxiradan maydonga tushgan hujumchi 11 daqiqa ichida dubl qayd etdi.

Yaqinda 29 yoshni qarshilaydigan Igor o'z ananasiga sodiq qolib, yana qirg'izlar darvozasini ishg'ol qildi. Uning hisobida Qirg'iz Respublikasiga qarshi 3 ta o'yinda urilgan 4 ta gol bor.

Statistikaga etibor qaratsak, Sergeev oxirgi 3 yilda 61 ta gol urgani ko'rinadi. Bu o'zbek hujumchilari orasidagi eng yaxshi natija. Ammo, terma jamoa ustozlari nazaridan doimiy ravishda chetda qolib kelmoqda.

Abramov boshqaruvidagi oxirgi 7 o'yinda Igorga o'zini ko'rsatish uchun atigi 1 daqiqa berilgandi. Katanec davrida ham shuncha o'yin ortda qoldi, lekin sloveniyalik mutaxassis Sergeevni 1 taymga ham tushirmayapti. Igor so'nggi bor 2020 yilning oktyabr oyida boshlang'ich tarkibdan o'rin olgan va BAA terma jamoasi darvozasiga 2 bor yo'l topgandi.

Balki, Igor bugungi gollaridan keyin Katanecning ishonchini to'liq oqlashga ulgurgandir. Shunday bo'lsa, u ko'p ehtimol bilan Ugandaga qarshi uchrashuvni asosiy tarkibda boshlaydi. Sizning bu boradagi fikringiz qanday?

Sergeev asosiy tarkibga munosib emasmi?