Аниқроқ айтсак, ёмон ўйин биз учун яхши натижа билан тугади. Учрашувнинг энг яхши ўйинчиси, шубҳасиз, беллашув тақдирини ҳал қилган Игорь Сергеев бўлди. Захирадан майдонга тушган ҳужумчи 11 дақиқа ичида дубль қайд этди.

Яқинда 29 ёшни қаршилайдиган Игорь ўз анъанасига содиқ қолиб, яна қирғизлар дарвозасини ишғол қилди. Унинг ҳисобида Қирғиз Республикасига қарши 3 та ўйинда урилган 4 та гол бор.

Статистикага эътибор қаратсак, Сергеев охирги 3 йилда 61 та гол ургани кўринади. Бу ўзбек ҳужумчилари орасидаги энг яхши натижа. Аммо, терма жамоа устозлари назаридан доимий равишда четда қолиб келмоқда.

Абрамов бошқарувидаги охирги 7 ўйинда Игорга ўзини кўрсатиш учун атиги 1 дақиқа берилганди. Катанец даврида ҳам шунча ўйин ортда қолди, лекин словениялик мутахассис Сергеевни 1 таймга ҳам туширмаяпти. Игорь сўнгги бор 2020 йилнинг октябрь ойида бошланғич таркибдан ўрин олган ва БАА терма жамоаси дарвозасига 2 бор йўл топганди.

Балки, Игорь бугунги голларидан кейин Катанецнинг ишончини тўлиқ оқлашга улгургандир. Шундай бўлса, у кўп эҳтимол билан Угандага қарши учрашувни асосий таркибда бошлайди. Сизнинг бу борадаги фикрингиз қандай?

Сергеев асосий таркибга муносиб эмасми?