Ushbu bahsdan so'ng O'zbekiston milliy terma jamoasi futbolchisi Server Jeparov savollarimizga javob berdi.

- Qatar terma jamoasiga qarshi uchrashuvdagi g'alaba nimani evaziga qo'lga kiritildi?

- Qatar terma jamoasiga qarshi barcha futbolchilar bor kuchi bilan o'yin olib bordi. Shuning evaziga yaxshi natijani qo'lga kiritdik. Raqiblarimiz ham g'alaba qozonish uchun harakat qilishdi. Ammo ularga omad etishmadi, biz ajoyib o'yin ko'rsatdik.

- So'nggi paytlarda standart vaziyatlardan to'pni jamoadoshlaringizga aniq etkazib bera olmayapsiz. Bu nima bilan bog'liq?

- Avvalgi o'yinlarni ko'rgan bo'lsangiz to'pni jamoadoshlarimga aniq etkazib berdim. Agarda siz o'yinlarimni ko'rgan bo'lsangiz, ulardan video rolik tayyorlasangiz bo'ladi. Men har doim o'rinli tanqidga yaxshi munosabatda bo'lganman. Hozir meni noto'g'ri tanqid qilayapsiz. Menga qanday savol bersangiz shunday javob beraman.

- Hujumda kam vaziyatlar yaratayapsizlar, yoki raqib jamoa yaxshi o'yin ko'rsatmoqda yoki bo'lmasam hujumchilarimiz o'z darajasida o'ynay olmayapti. Bunga qanday fikr bildirasiz?

- Hamma jamoalar himoyalanishni o'rganib olgan. Qatarga qarshi uchrashuvda raqib darvozasini ishg'ol qilish uchun ko'plab imkoniyatlarimiz bo'ldi. Mana shu vaziyatlardan faqat bittasidan unumli foydalandik xolos. Qatar terma jamoasi ham ajoyib o'yin ko'rsatdi.

- Suriya terma jamoasiga qarshi uchrashuvda mag'lub bo'lishinglarga maydon halaqit qildimi?

- Albatta, maydonning holati juda ham ayanchli xolatda edi. Ob-havo ham yomon bo'ldi. Bu narsani bahona qilib ko'rsatmoqchi emasman. Ular ham aynan xuddi shunday sharoitda harakat qilishdi. Suriya terma jamoasiga qarshi uchrashuvda omad bizdan yuz o'girdi.

- Keyingi turda guruhdagi kuchli bo'lgan raqib, Eron terma jamoasiga qarshi bahs olib borasizlar. Safardan g'alaba qozonib qaytishinglarga ishonyapsizmi?

- Hamma uchrashuvlar qiyin kechmoqda. Guruhimizdagi barcha o'yinlar deyarli 1:0 hisobida yakunlanmoqda. Bir marotaba Xitoy terma jamoasiga qarshi uchrashuvda 2:0 hisobida g'alaba qozondik. Eron yaxshi terma jamoa, ushbu terma jamoaga qarshi uchrashuv biz uchun qiyin kechishi turgan gap. Avvalgi JCH saralash bosqichida ularni o'z uyida mag'lubiyatga uchratganmiz. Barchasi o'z qo'limizda. Nasib qilsa Erondan g'alaba bilan qaytamiz.

Jahongir Sotvoldiev suhbatlashdi

Server Jeparov: “Guruhimizda barcha terma jamoalar kuchli”