"Atletiko" - "Barselona"

Bu o'yin juda asabiy tarzda kechishini taxmin qilish qiyin emas. Har ikkala jamoa bir-birini juda yaxshi biladi. Har ikkala jamoa murabbiylari ushbu mavsumda bir necha bor o'zaro to'qnash kelishdi. Lekin hozirgacha bu ikki jamoa o'rtasidagi bahslarda g'olib nomi aniqlanmay kelmoqda. Bu har ikkala jamoa bir-biriga mos raqibligidan darak beradi. Vaziyatga real qaraydigan bo'lsak, birozgina ustunlik "Atletiko" tarafida. Ular mehmondan qoniqarli natijani qayd etib qaytishgan va o'z maydonlarida bor kuch-g'ayratlarini ishga solishlari aniq. "Atletiko" ayni paytda "Barselona"ga nisbatan jichchagina ruhiy ustunlikka ham ega bo'lib turibdi. Diego Simeone jamoasini mag'lub etish hozircha Xerardo Martino jamoasiga nasib etmayapti. Balki bugungi o'yinda ular bu ishni amalga oshirishar. Buni vaqt ko'rsatadi. Bu o'yinda favorit yo'q. Bu Chempionlar ligasi. "Barselona"ning eng katta ustunligi bu futbolchilarning tajribasida. Ular individual jihatdan raqib futbolchilaridan ustunroq sanalishadi. Aynan shu jihat madrikliklarni mag'lub etishda katta o'rin tutishi mumkin. Lekin Diego Simeone jamoasini katta ishtiyoq va shijoati kuchlilik qilsa, unda kataloniyaliklarga qiyin bo'lishi muqarrar. Bu o'yinda yana g'olib nomi aniqlanmasligi mumkin. Balki "lotoreya" orqali omadli jamoa yarim finalga yo'l olar? Buni o'yindan so'ng bilib olamiz.

"Bavariya" - "Manchester Yunayted"

Bu o'yin borasida bir gap aytish qiyin. Sababi bu Chempionlar ligasi. Agarda o'zimni fikrimni bildiradigan bo'lsam, bugun Myunxen jamoasi etarlicha qarshilikka duch kelishi mumkin. Lekin hozirgi "Manchester Yunayted" "Alyanc Arena"da "syurpriz" ko'rsatishi anchagina qiyin masala. Hozirgi "Bavariya" haqida ortiqcha gapirish shart bo'lmasa kerak. Futbolda favorit yoki autsayder so'zini ishlatishni yomon ko'raman. Bu esa Chempionlar ligasi. Bu juda katta musoboqa. Bu erda katta-katta jamoalarning kichikroq xatolari ham kechirilmasligi mumkin. O'yin yaxshi o'tishi aniq. Mehmondagi durang natijasi Pep Gvardiola uchun ogohlik qo'ng'irog'i bo'ldi. Endi nimchorak finalda bo'lgani kabi hisobni ushlab qolish uchun o'z maydonida zerikarli futbol namoyish etishga haqqi yo'q bu jamoani. O'ylashimcha, bu o'yinda juda ko'plab gollar kiritiladi. Natija mezbon jamoani ranjitmasligi mumkin. Bu shaxsiy fikrim. O'yin esa hammasini ko'rsatib beradi.

Shahboz Beg'amov: "Katta-katta jamoalarning kichikroq xatolari ham kechirilmasligi mumkin"