Iqtidorli futbolchi kecha o'zining sobiq jamoasiga qarshi ilk bor o'ynadi.

- Shahzod, ilk bor “Mashal”ga qarshi o'ynadingiz. Garchi o'z maydoninglarda o'ynagan bo'lsanglarda, yakunda kichik hisobda mag'lubiyatga uchradinglar. Mazkur bahs haqida fikrlaringiz qanday?
- Uchrashuv qiyin kechishini oldindan bilardik. Muxlislarimizni g'alaba bilan xursand etish uchun harakat qildik. Gol urish uchun bir qator vaziyatlar bo'ldi. Ammo ulardan unumli foydalana olmadik. “Mashal”ga omad ham kulib boqdi. Ular bitta golli vaziyatdan oqilona foydalanib qolishdi.

- Aytingchi “Mashal” nimani hisobiga g'alaba qozondi?
- Bu jamoa futbolchilari yakka kurashlarda ko'pincha ustunlik qildi. Qolaversa g'alaba qozonish xohishi ham ularda kuchlilik qildi. Buning uchun ular o'yin oxirlarida ko'p hujum uyushtirdi.

- “Mashal” sobiq klubingiz bo'lgani uchunmi, maydonda nimanidir isbotlashga harakat qilib o'ynagandek tuyuldi. Bu o'yinga shaxsan siz o'zgacha tayyorlanganmidingiz?
- Ha, albatta. Hozirgi jamoamning manfaatidan kelib chiqib bugun uning g'alaba qozonishini istagandim. Buning uchun “Mashal” darvozasiga gol urishni xohladim. Afsuski bu o'xshamadi.

- “Andijon” ortda qolgan uchta turdan keyin ochko olish tugul hattoki gol ham kirita olmadi. Omadsizlikni qanday izohlagan bo'lardingiz?
- Bu vaqtinchalik xolat deb o'ylayman. Nasib qilsa kelgusi o'yinlarda hammasi yaxshi bo'ladi.

- Endi jamoangiz keyingi turni safarda “Olmaliq”qa qarshi o'tkazadi. Bo'lajak bahs ham oson bo'lmaydi. Fikrimizga qo'shilasizmi?
- Ha, to'g'ri. Bu o'yinda bor kuchni ishga solib ochko olishga harakat qilamiz. Chunki o'zingiz ko'rib turibsiz jamoa so'nggi o'rinlarda yuribdi. Bu hech bir jamoaga yoqmaydi. Shuning uchun keyingi o'yinlarda ochko jamg'arishga urinamiz.

Islombek RUSTAMBEKOV suhbatdashdi.

Shahzod Shaymanov: “Mashal” ga gol urishni istagandim”