"Lacio" - "Inter"

Shubhasiz, Sarri uchun jarohatlangan bir nechta futbolchining qaytishi yaxshi yangilik bo'ldi. Birinchi navbatda bu Chiro Immobile bilan bog'liq. Shuningdek, Cakanya ham safda, ammo u o'yinni asosiy tarkibda boshlamasa kerak. Afsuski, diskvalifikaciya sabab Acherbi jamoasiga yordam berolmaydi. Simone Indzagining bosh og'irig'i esa asosan faqat terma jamoadan qaytganlar bilan bog'liq. Lautaro, Vidal va Vesino juda kech qaytishlari sabab, bo'lajak bahsga qanchalik tayyor bo'lishlari nomalum. Agar vaziyat taqozo etsa hujumning oldingi chizig'ida Jeko va Korrea juftligini ko'rishimiz mumkin. Jarohatidan forig' bo'lgan Sensi zaxirada qoldiriladi.

Oxirgi o'zaro o'yinda "Inter" uyda "Lacio"ni 3-1 hisobida mag'lub etgan, Rimda esa "qora-ko'klar" 2018 yildan buyon zafar quchishmagan. Umuman olganda, hozir aynan "neradzurri" favorit hisoblanadi, ammo bu bahs hech kimga oson bo'lmasligi turgan gap.

"Milan" - "Verona"

Piolining muammolari juda jiddiy. Birinchi navbatda bu asosiy posbon Manyanning jarohati, posbon 2 oyga maydondan chetda qolmoqda. Shunday ekan, darvoza tajribali Tatarushanuga ishonib topshiriladi. Biroq bu hali hammasi emas. Teo Ernandes kovidga chalingan, Bakayoko va Florenci, Masyas esa jarohatlangan. Agar bu tur o'yinida Krunich va Kalabriya qayta olsa, jamoa muxlislari xursand bo'lsa arziydi. Hujumda esa umid Jiru hamda orqaroqdan uni qo'llaydigan Rebich va Diasdan bo'ladi. "Verona"da bu kabi muammolar yo'q, Velozu va Faraoni katta ehtimol bilan bahsga tayyor, shunday ekan "mastiflar" tarkibi optimal bo'lishi kutilmoqda.

So'nggi bor ushbu raqiblar to'qnash kelganida "Milan" safarda 2-0 hisobidagi ishonchli g'alabani rasmiylashtirgan. Muammolariga qaramay, "rossoneri" bu safar ham yaqqol favorit hisoblanadi. Nazarimizda, "Verona" qanchalik harakat qilmasin, bugungi kunda raqib hujumiga dosh bera olmaydi.

"Yuventus" - "Roma"

Allegrining muammolari kun sayin ortib borayotgandek. O'yinchilar termadan qanday holatda qaytishi degan savoldan tashqari, jarohatlar ham turinliklarni tinch qo'ymayapti. Tanganing ikkinchi tomoni bo'lganidek, Artur, Remsi, Morata va Dibala shu kunlarda safga qaytishi kutilmoqda, lekin nima bo'lganda ham ushbu futbolchilar o'yinni ko'pi bilan zaxirada boshlaydi. Asosiy tarkibda esa Moyze Kinni ko'rsak ajab emas. Joze Mourinyu esa bu borada nisbatan xotirjam bo'lishi mumkin. Lekin Abraxamning holati so'roq ostida qolmoqda. U Angliya termasi o'yinida kichik jarohat olgan va asosiy tarkibda Eldor Shomurodovni ko'rishimiz ehtimoli yuqori. Unga odatdagidek Zanolo va Mxitaryan yordam beradi.

So'nggi to'qnashuvda, u ham Turinda o'tgan, "Yuventus" 2-0 hisobida zafar quchgan. Bukmekerlar "keksa sinora"ni bu safar ham favorit sifatida ko'rmoqda, biroq oradagi farq u qadar katta emasligini aytib o'tish zarur. "Roma" bu mavsum kamida qiziqroq o'yin ko'rsatayotganini inobatga olsak, bizni shiddatli bahs kutib turibdi.

"Napoli" - "Torino"

Manolos jarohat sabab bu o'yinda neapolliklarga yordam bera olmasligi mumkin. Shuningdek, Una va Petanya ham maydonga tusha olmaydi. Ammo Lobotka safga qaytdi va ikkinchi bo'limda o'yinni kuchaytirishi mumkin. Hujumda esa yana Insine - Osimxen juftligini ko'rsak ajab emas, ularga Politano ham yordamlashadi. Mehmonlar uchun xushxabar - Belotti sog'aydi. Teoretik jihatdan sardor o'yinni asosiy tarkibda boshlashi mumkin, biroq zaxirada qolib, keyin o'yinni kuchaytirish uchun maydonga tushirilishi haqiqatga yaqinroq. Verdi, Prat va Zadza hamon lazaretda, shu sabab hujum chizig'ida variantlar u qadar ko'p emas. Murabbiy baxtiga Linetti va Rodriges xizmatlaridan foydalanishi mumkin.

Oxirgi uchrashuvda "Napoli" Turinda ortiqcha muammolarga duch kelmagan (2-0). Endigi bahs favoriti ham aynan chempionat etakchisi hisoblanadi va ular buni amalda isbotlashi zarur. Jamoaning bugungi sport formasini inobatga olsak, Spaletti shogirdlari buni uddalay oladilar.

Sergey Rumyancev
Nozima Zaripova tarjimasi

Shomurodov "Yuventus"ga qarshi, "Lacio" - "Inter" va boshqa o'yinlar haqida