Гап шундаки, грузиялик мураббий янги мавсумга ёки бир даврадан иккинчисига тайёргарлик кўриш жараёнида кўпинча қуйи лига клублари билан ўртоқлик учрашувлари ўтказади. У жамоани секин-аста тайёрлаб бориб, бирданига кучли жамоалар билан ўйнатмайди.

Масалан, ёзги пайтни ёдга олайлик. Арвеладзе "Пахтакор" бош мураббийи этиб тайинланганида ҳали биринчи давра тугамаганди. У фақат Жасур Абдураимов ўз ишини тугатиб қўйишини кутди. Орадан сал вақт ўтиб "Аякс" клуби собиқ футболчиси бош мураббийликни қўлга олгач, "Пахтакор" иккинчи даврага тайёргарликни бошлаб юборди.

Иккинчи давра арафасида жамоа асосан ўзимизнинг биринчи лига клублари билан ўйнади. Аввалига "Локомотив-БФК", кейин навбати билан "НБУ-Осиё" ва "Янгиер". Шундан сўнг жамоа хориж йиғинини ўтказиш учун Туркияга йўл олди. Туркияда "Пахтакор" учта ўртоқлик учрашуви ўтказди: "Себаил" (Озарбайжон) ҳамда Саудия Арабистонининг икки клуби - "Ал Иттифоқ" ва "Ал Раед"га қарши.

Чемпионатни учинчи ўринда тугатган "Пахтакор" кейинги йилга тайёргарликни 23 декабрдан бошлади. Шу кунларда Туркияда бўлиб турган жамоа кетиш олдидан ўзимизда битта ўртоқлик ўйини ўтказди. Рақиб эса "Оқтепа". "Оқтепа" ўтган йил биринчи лигада қатнашмади, жамоа энди йиғила бошлади, шунга қарамай Арвеладзе улар билан ўйнашни маъқул кўрди.

"Пахтакор"нинг Туркиядаги рақиблари ҳам номдор эмас. Хусусан жамоа бугун ўйнайдиган "Тургутлуспор" учинчи лига клуби ҳисобланади. Кейинги рақиб "Шанлиурфаспор" иккинчи лигада иштирок этади. Шунингдек, Албаниянинг "Партизани", Македониянинг "Вардар" клублари билан ҳам ўйинлар бор.

Туркияда бемалол номдор клубларга қарши спарринг-ўйин ўтказса бўлади, у ерда масалан Россия ва Украина клублари ҳам йиғин ўтказмоқда. Лекин мадомики Шота Арвеладзе мавсумга тайёргарлик жараёнида жамоани кучсиз жамоаларга қарши ўртоқлик учрашувлари орқали тайёрлар экан, демак буни унинг ўзига хос услуби дея оламиз. Мураббий учун муҳими 30 январь куни "Ал Гарафа"ни мағлуб этиб "Пахтакор"ни ОЧЛ гуруҳ босқичига олиб чиқса бас.

"Пахтакор" 23 декабрь куни йиғилган бўлса, орадан икки-уч кун ўтиб футболчилар ПФЛ талаб қилаётган спорт нормативларини топширишлари керак эди. Яъни, 30 метрга югуриш, узунликка сакраш, "Йо-Йо" тест деганларидек. Лекин Арвеладзе футболчилар ҳали норматив топширишга тайёр эмас деб қатъиян бунга рози бўлмади ва норматив олиш учун келган одамларга бир оғиз гап билан йўқ деди.

Бундан кўриниб турибдики, мураббийнинг мавсумга тайёргарлик ўз режаси бор ва бу жараёнда ҳеч ким унга халақит беришини истамайди. Ҳатто ПФЛ ҳам. Чунки у билади эртага натижа учун ўзи жавоб беришини, нимадир ўхшамай қолса ҳеч ким Шамиль Исаев бошчилигидаги нормативчилардан нега бундай бўлди деб сўрамайди, ҳамма Шота Арвеладзени саволга тутади. Шу боис ҳам мураббий ҳозирча футболчилар тайёр эмаслигини шартта айтди-қўйди.

Тўғриси, мана шу томонлама ҳам менинг Арвеладзега бўлган ҳурматим ошди. Чунки жамоада у - бош мураббий. Унинг айтгани бўлиши шарт. Футболчилар мавсумга тайёрми-йўқми, ўзи ҳал қилади. Бу ўринда бош мураббий ишига ҳеч кимнинг аралашишга ҳаққи йўқ. Негаки кўп йиллардан бери айтилиб келинаётган гап ўша гап: натижага мураббий жавоб беради.

Шота Арвеладзенинг ўзига хос услуби