Jizzaxliklar bu safar o'z maydonida “Andijon”ni yirik – 4:1 hisobida mag'lub etdi. Mezbonlarning dastlabki goliga mualliflik qilgan Javohir Qahramonov “uchrashuvning eng yaxshi o'yinchisi” deya etirof etildi.

- Javohir, avvalambor qo'lga kiritilgan navbatdagi g'alaba bilan tabriklaymiz. “Andijon” bilan o'tgan o'yinda jamoangiz yirik hisobda g'alaba qozondi. Bunga go'yoki osonlikcha erishgandek taassurot qoldirdi. Bu haqda nima deysiz?
- Tabrik uchun rahmat. Men ham fursatdan foydalanib, xalqimizni musulmonlar bayrami – Ramazon Hayit bilan chin dildan tabriklayman. O'yin haqida fikr bildiradigan bo'lsam, futbolda g'alabalar osonlikcha erishilmaydi. Buning zamirida qattiq mexnat yotadi. Avvalo kim o'yinga tayyor bo'lsa, o'sha jamoa g'olib bo'ladi. Shu kuni omad bizga kulib boqdi va muvaffaqiyat qozondik. “Andijon” ham yaxshi jamoa. Iqtidorli o'yinchilar etishib chiqmoqda. Faqat ularga tajribali futbolchilar etishmayapti deb o'ylayman.

- “Andijon” tarkibida siz yaxshi tanigan bilgan futbolchilar to'p tepmoqda. Bu jamoaning o'yini to'g'risida fikringizni bilmoqchi edik?
- Deyarli hamma o'yinchilarini yaqindan taniyman. Ularning 3-4 nafari bu yil Superligada debyut qildi. O'yindan o'yinga vaqt o'tgan sari o'sib borishadi. Yoshlar dastlabki mavsumdayoq barqaror o'ynab ketishi qiyin. Ijobiy natijaga erishish uchun vaqt kerak bo'ladi.

- Uchrashuvning eng yaxshi o'yinchisi sifatida etirof etildingiz. Shaxsan o'zingiz ko'rsatgan o'yiningizdan qoniqish hosil qildingizmi?
- Har bir o'yinga g'alaba qozonish uchun chiqamiz. Futbol jamoaviy o'yin bo'lgani uchun bir kishini alohida ko'rsatish yaxshimas. Har bir futbolchi maydonga chiqqach, o'z ishini qilsa natija ham ijobiy ko'rinish oladi.

- “So'g'diyona” uchun chempionatda xaqiqiy janglar endi boshlanadi deyish mumkin. Bo'lajak uchrashuvlarda mag'lubiyatsiz seriyani davom ettirish imkoniyatini qanday baholaysiz?
- Yuqorida aytib o'tganimdek, maqsadimiz raqib kim bo'lishidan qatiy nazar g'alaba qozonishdir. Hech bir uchrashuv oson o'tmasligi oldindan malum. O'yinga kim tayyor bo'lsa, o'sha jamoa g'alaba qozonadi. Nima bo'lishini oldindan aytib bo'lmaydi. Hammasini o'sha paytda bilamiz.

- “So'g'diyona” muvaffaqiyatining siri nimada?
- Futbolda ko'p narsa omadga bog'liq. Qolaversa tayyorgarlik ham juda muhimdir. Hozircha hammasi biz uchun yaxshi kechmoqda va bundan albatta xursandmiz. Kezi kelganda muxlislarimizga ham minnatdorchilik bildirib o'tishni istardim. Zero ularning qo'llab-quvvatlashi ham biz uchun muhim ahamiyat kasb etib kelmoqda.

“So'g'diyona” muvaffaqiyatining siri nimada?" Javohir Qahramonov bilan suhbat