Viktor Kumikov ustozligidagi jamoa 4:2 hisobidagi g'alabani qo'lgak kiritdi. Uchrashuvdan keyin mezbonlar hujumkor yarim himoyachisi Suhrob Berdiev fikrlariga quloq tutdik.

“O'yin juda qiyin bo'lishini bilardik. Chunki “Mashal” oldingi bahsda ham bizga yaxshigina qarshilik ko'rsatgandi. Muborakda 0:0 hisobida durang o'ynagandik. Shu sabab bahsga astoydil tayyorgarlik ko'rdik. Shuningdek, murabbiylar tomonidan berilgan ko'rsatmalarni to'g'ri bajardik. Birinchi bo'limda o'yinimiz unchalik o'xshamadi. Tanaffusdan keyin rejadagidek o'ynay boshladik va muhim g'alabani qo'lga kiritdik. Bu orqali esa chempionlik va Superliga yo'llanmasiga erishdik.

To'g'risi, o'zimning faoliyatimdan to'liq bo'lmasa ham, aytaylik 80-90 foizga qoniqish hosil qildim. Yanada yaxshiroq harakat qilsam bo'lardi. Asosiysi, jamoamiz bilan Superligaga chiqib oldik. Xudo xohlasa, keyingi yillarda yanada yaxshiroq o'ynash imkoniyati paydo bo'lmoqda.

“Andijon” Superligada ham munosib ishtirok eta oladi. Chunki jamoaning ajoyib muxlislari bor. Ular doimiy ravishda klubni qo'llab-quvvatlasa natijalar ham yaxshi bo'laveradi. Shu fursatdan foydalanib, jamoamizning barcha muxlislariga o'z minnatdorchiligimni bildirmoqchiman. Ular bunday g'alabalarga haqli.

Ikkinchi yo'llanmaga kim munosib bo'lsa, o'sha chiqsin. Men hozir “Buxoro” yoki “Turon” deb ayta olmayman”, - deb so'zini yakunladi Berdiev.

Suhrob Berdiev: “Andijon” Superligada ham munosib ishtirok eta oladi”