Виктор Кумиков устозлигидаги жамоа 4:2 ҳисобидаги ғалабани қўлгак киритди. Учрашувдан кейин мезбонлар ҳужумкор ярим ҳимоячиси Суҳроб Бердиев фикрларига қулоқ тутдик.

“Ўйин жуда қийин бўлишини билардик. Чунки “Машъал” олдинги баҳсда ҳам бизга яхшигина қаршилик кўрсатганди. Муборакда 0:0 ҳисобида дуранг ўйнагандик. Шу сабаб баҳсга астойдил тайёргарлик кўрдик. Шунингдек, мураббийлар томонидан берилган кўрсатмаларни тўғри бажардик. Биринчи бўлимда ўйинимиз унчалик ўхшамади. Танаффусдан кейин режадагидек ўйнай бошладик ва муҳим ғалабани қўлга киритдик. Бу орқали эса чемпионлик ва Суперлига йўлланмасига эришдик.

Тўғриси, ўзимнинг фаолиятимдан тўлиқ бўлмаса ҳам, айтайлик 80-90 фоизга қониқиш ҳосил қилдим. Янада яхшироқ ҳаракат қилсам бўларди. Асосийси, жамоамиз билан Суперлигага чиқиб олдик. Худо хоҳласа, кейинги йилларда янада яхшироқ ўйнаш имконияти пайдо бўлмоқда.

“Андижон” Суперлигада ҳам муносиб иштирок эта олади. Чунки жамоанинг ажойиб мухлислари бор. Улар доимий равишда клубни қўллаб-қувватласа натижалар ҳам яхши бўлаверади. Шу фурсатдан фойдаланиб, жамоамизнинг барча мухлисларига ўз миннатдорчилигимни билдирмоқчиман. Улар бундай ғалабаларга ҳақли.

Иккинчи йўлланмага ким муносиб бўлса, ўша чиқсин. Мен ҳозир “Бухоро” ёки “Турон” деб айта олмайман”, - деб сўзини якунлади Бердиев.

Суҳроб Бердиев: “Андижон” Суперлигада ҳам муносиб иштирок эта олади”