Boisi, “Qaldirg'ochlar” 21 yanvar kuni o'z maydonida OCHL saralash bosqichi doirasida Iroqning “Al Zavra” jamoasini qabul qiladi. Shu boisdan futbolchilar va murabbiylar 16 dekabr sanasidan etiboran mashg'ulotlarga kirishishdi. Bosh murabbiy Vadim Abramov davolanishda ekanligi sababli, uning o'rniga yordamchisi Marat Miftaxutdinov jamoaga boshchilik qilmoqda. Tarkibga yangi futbolchilar jalb etilishi haqida aniq malumot yo'q. Lekin, murabbiyning takidlashicha bir qator tajribali futbolchilar bilan muzokaralar olib borilmoqda. Yanvar oyida bu borada yangiliklar bo'lib qolishi mumkin. Hozirda esa yosh va iqtidorli shuningdek, ijaradan qaytgan futbolchilar bilan yig'in davom ettirilmoqda. Mazkur yig'in davomida nazorat uchrashuvi o'tkazilishi ham rejalashtirilgan. Bugungi mashg'ulotlar yakuniga etgach jamoa azosi Suhrob Izzatov tayyorgarlik hususida fikrlarini bildirib o'tdi.

- Dastlab yangi mavsumga boshlangan tayyorgarlik haqida ikki og'iz fikr bildirsangiz. Ilk kungi mashg'ulotlar qanday o'tdi?
- Ko'rib turibsiz yig'inni alo kayfiyatda boshlab oldik. Yangi futbolchilar sinovdan o'tkazilyapti,boisi jamoani ayrim o'yinchilar tark etdi. Qolganlar OTJ bilan Osiyo chempionatiga hozirlik ko'rishyapti. Chempionlar Ligasi bahslari boshlanguniga qadar safimizni kuchli futbolchilar bilan to'ldirib olamiz degan umiddaman. Niyatimiz saralash va pley-off bosqichidan o'tib, guruh bosqichiga chiqish.

- Mashg'ulotlar jarayonida tajribali futbolchilarning yo'qligi sezilyaptimi?
- Ha. Ularning yo'qligi bilinyapti. Biz yoshlarni tajribali o'yinchilardan o'rganadigan jihatlarimiz ko'p. Bizdan ko'ra ko'proq bilimga va ko'nikmaga ega. Vaqt o'tgan sari ular ham faoliyatlarini yakunlashadi. Boz ustiga futbol jamoaviy o'yin. Bir o'yinchiga bog'lanib qolish ham yaramaydi.

- Osiyo Chempionlar Ligasidai raqiblar qay darajada xavfli? Umuman shu haqida fikr bildirsangiz?
- “Al Zavra” ham, “Al Ayn” ham shunchaki maydonga chiqishmaydi. BAA klubi juda kuchli. Saviya va maxorat bobida ham ustun. Yuqori darajadagi legionerlar to'p tepishini bilamiz. Maqsadimiz keyingi yil OCHLda uzoqroqqa borish va bu yilgi natijamizni yaxshilash.

- Birinchi davrada jamoaning asosiy tarkibidan joy olayotgan edingiz. Lekin, kutilmaganda diqqat markazidan g'oyib bo'lib qoldingiz...
-To'g'ri aytdingiz. Jamoaga sekin asta qo'shilib ketayotgandim. Biroq, jarohat bois ancha vaqt yashil maydondan chetda yurdim. Belorussiyadagi yig'in mobaynida oyog'imdan lat edim. Oldimizda qiyin o'yinlar kutib turgan edi. O'z maydonimizdagi bahslarda ochkolar yo'qotib, ahvolimizni og'irlashtirdik. Muhimi yakunda uchinchi o'rinni o'zimizniki qildik.

Abdulaziz Iskandarov suhbatlashdi

Suhrob Izzatov: "Bunyodkor"ning maqsadi OCHL guruh bosqichiga chiqish"