Яхши дам меҳнатга ҳамдам. Лекин бу кимга фойда? Буни тез орада билиб оламиз.

"Сурхон" - "Қизилқум"

- "Қизилқум" ўз тарихида меҳмонда ҳали "Сурхон"ни мағлуб эта олмаган. "Сурхон" ўзаро ўйинларда уйда навоийликларга қарши 9 маротаба майдонга чиққан ва 7та учрашувда ғалабани бегона қилмаган, 2та ўйинда дуранг қайд этилган.

- "Қизилқум" 19 йилдан бери "Сурхон" дарвозасига йўл топа олаётгани йўқ. Сўнгги бор "олтин изловчилар" 2004 йил термизликлар посбонини ранжитган (1:2)

- "Қизилқум" Суперлигада иккинчи даврада ҳали ғалаба қозонгани йўқ, 4 мағлубият, 1 дуранг.

- "Сурхон" бу мавсум уйда очко жамғариш бўйича кучли учликда кетмоқда. Термизликлар 9та учрашувнинг 6тасини ўз фойдасига ҳал қилган, 1та ўйинда дуранг, 2та учрашувда мағлубиятга учраган.

- "Қизилқум" бу мавсум Суперлигада меҳмонда ғалаба қозонмаган ягона жамоа бўлиб турибди. Кўрсаткич шунчаки дахшатли: 2 дуранг, 7 мағлубият, 1-15. Жамаоа сафарда фақат "Пахтакор"га гол урган.

- Биринчи даврадаги учрашувда ғолиб номи аниқланмаган (0:0).

"Андижон" - "Навбаҳор"

- "Андижон" ўз майдонида 7 йилдан бери "Навбаҳор"ни мағлубиятга учрата олаётгани йўқ. "Бургутлар" сўнгги маротаба 2016 йил Рўзимбой Аҳмедовнинг ягона голи эвазига ғалаба қозонган.

- Александр Хомяков шогирдларининг уйдаги мағлубиятсиз серияси 5тага етган. Жамоа охирги маротаба 5 май куни "Сўғдиёна"га уч очкони совға қилган.

- "Навбаҳор" Суперлигада 4та ўйиндан буён майдонни ғалабасиз тарк этмоқда. "Лочинлар" сўнгги бор Суперлигада 30 июль куни 14-турда "Қизилқум"ни мағлуб этган.

- Александр Хомяков бош мураббий сифатида "Навбаҳор"ни сўнгги маротаба 2017 йил "Машъал" устози сифатида таслим қилган (2:1).

- Жамоаларнинг биринчи даврадаги ўйинида "лочинлар"нинг қўли баланд келган (1:0)

ОКМК - "Металлург"

- Олмалиқликлар 2 йилдан буён "Металлург"дан 3 очко тортиб олишни уддасидан чиқмаяпти. Ушбу жамоалар ўртасида ўтган сўнгги 3 ўйиннинг барчаси бекободликлар фойдасига ҳал бўлган.

- "Металлург" меҳмондаги сўнгги 4та ўйиннинг 3тасида мағлубиятга учраган.

- Олмалиқда бу жамоалар ўртасида мухлислар доим гол гувоҳига айланишган ва 0:0 ҳисоби қайд этилмаган.

- ОКМК ўз майдонидаги ўзаро учрашувларда катта устунликка эга, 11 ғалаба, 2 мағлубият, 2 дуранг.

"Сўғдиёна" - "Пахтакор"

- "Пахтакор" 2019 йилдан буён Жиззахдан ортга ғалабасиз қайтмоқда.

2020. "Сўғдиёна" - "Пахтакор" 1:0

2021. "Сўғдиёна" - "Пахтакор" 1:0

2022. "Сўғдиёна" - "Пахтакор" 2:2

Бу оралиқда жамоани Питер Хюистра, Славче Войнески ва Максим Шацких бошқаришга улгурди.

- "Пахтакор" бу йил меҳмонда энг кўп очко қўлга киритган жамоа ҳисобланади ва бу форматда ҳам жамоа етакчиликни қўлга олган. Натижалар: 7 ғалаба, 1 дуранг, 1 мағлубият, тўплар нисбати 16-8, 22 очко. Рақиб майдонидаги ягона мағлубият 2-турда "Нефтчи"дан қабул қилиб олинган.

- Иван Бошкович мураббий сифатида "Пахтакор"га қарши 3 маротаба жамоасини майдонга бошлаб тушган ва 3тасида ҳам мағлубиятга учраган. Демак черногориялик мураббий ишлаган жамоаларида "шерлар"ни таслим қила олгани йўқ.

"Насаф" - "Бунёдкор"

- "Бунёдкор" 2018 йилдан буён Қаршида ғалаба қозона олмаяпти. Бу борада Миржалол Қосимов "Насаф"ни сафарда ютган сўнгги "қалдирғоч" бўлиб турибди.

2019. "Насаф" - "Бунёдкор" 3:1

2020. "Насаф" - "Бунёдкор" 2:2

2021. "Насаф" - "Бунёдкор" 5:0

2022. "Насаф" - "Бунёдкор" 1:1

- Пойтахт клуби "Насаф" билан ўйинлардаги сўнгги ғалабасини 2021 йил ўз майдонида Шуҳрат Мақсудов мураббийлигида нишонлаган (2:0).

- "Насаф" ўз майдонида 8та ўйиндан бери мағлубиятга учрамаяпти. "Андижон" "аждарлар"ни сафарда таслим қила олган ягона жамоа бўлиб турибди.

- Раҳимбек Каримов бу йил "Бунёдкор" - "Насаф" ўртасидаги 2-ўйинда ҳам ишлайди. Жамоаларнинг биринчи даврадаги ўйинида у бош ҳакам сифатида учрашувни бошқарган бўлса, 24 сентябрь куни бўладиган ўйинда ВАРда ишлайди.

Суперлига 19-тур превьюси. "Қалдирғоч"нинг қаноти Қаршида қайриладими?