Timur Kapadze boshqaruvidagi O'zbekiston U-23 terma jamoasi 2 aprel kuni yig'inga kirishadi.

Parij Olimpiadasi yo'lida kurashga kiradigan Kapadze terma jamoa yig'iniga "Nasaf"dan 4 va "Paxtakor"dan 5 nafar futbolchini jalb qildi. Ularning barchasi o'z jamoasining asosiy futbolchilari hisoblanadi. Shuningdek, "Olimpik" terma asosini tashkil qiladi.

Liga olimpiya termasi bilan 2024 yilgi taqvim masalasida o'tgan mavsumning oktyabr oyida fikr almashgan bo'lib, unda Superliga 5-turidagi ayrim bellashuvlar sanasi o'zgarishi ko'zda tutilgandi. Olimpiyachilar Qatarga yo'l oladigan davrda esa O'zbekiston Kubogining guruh bosqichi o'yinlari o'tkaziladi. Mazkur musobaqada "Olimpik" Toshkentda qolgan futbolchilar bilan ishtirok etishi masalasida kelishilgan.

Kutilganidek, Kapadze "Nasaf" va "Paxtakor" klublarining 3 nafardan ortiq futbolchisiga suyanishga qaror qildi. "Superliga va Proliga reglamenti"ning 10.9-bandida olimpiya terma jamoasi uchun uch futbolchisini taqdim etgan klub oldindagi bellashuv sanasini o'zgartirishni so'rashga haqli ekanligi ko'rsatilgan. "Nasaf" va "Paxtakor" bu imtiyozdan foydalanishga qaror qildi. Shuningdek, kelishuv asosida "Olimpik" ishtirokidagi Superliga o'yini ham ular qatorida boshqa sanada o'tkaziladi.

Superliga 5-turida "Nasaf" "Navbahor" bilan uy, "Paxtakor" esa "Neftchi" bilan safar o'yinida ishtirok etishi kerak edi. Liga qoldirilgan bellashuvlar qachon bo'lib o'tishi masalasiga keyinroq oydinlik kiritadi.

Superliga. 5-turning 3 ta o'yini nomalum muddatga qoldirildi