Faqat 3 ochko!

Har 2 jamoa g'alaba ilinjida maydonga chiqadi. Oxirgi 9 turda 1 ochko bilan kifoyalangan Samarqand klubi elitada qolishni istasa, "qaldirg'ochlar"ning "qanotini qayrishi" kerak. "Bunyodkor"dagi vaziyat ham boshqacha emas. So'nggi 11 o'yinning faqat 1 tasini g'alaba bilan yakunlagan toshkentliklar shu hafta kubokni ham tark etishdi. Hozirgi vaziyatda muxlislar va rahbariyatni tinchlantirish uchun ham yutuq kerak. Shu tufayli kurash hakamning yakuniy hushtagi chalinguniga qadar davom etsa kerak.

Norsafarov qaytdi

12-tur doirasidagi "Olimpik" 1:0 AGMK o'yinidan keyin diskvalifikaciya qilingan Firdavs Norsafarov ushbu o'yin orqali Superligaga qaytyapti. "Bunyodkor" bu yil qarshilik referi ishlagan 2 o'yinda 1 ochko bilan cheklangan edi:

8-tur. "Bunyodkor" 1:1 "Metallurg"
11-tur. "Surxon" 1:0 "Bunyodkor"

28 yoshli arbitr "Dinamo" ishtirokidagi uchrashuvda so'nggi bor 2020 yilda ishlagan, o'shanda samarqandliklar "Neftchi" ustidan zafar quchishgandi (2:0).

To'qnashuvlar tarixi

Statistikadagi mutlaq ustunlik "Bunyodkor" tomonida. Toshkent klubi "Dinamo"ga qarshi 23 o'yinning 19 tasini o'z foydasiga hal qilgan, 3 ta bahsda kuchlar teng kelgan. Samarqandliklarning yagona g'alabasi esa 2014 yilga to'g'ri keladi. "Jar" stadionida o'tgan uchrashuv taqdiri hakam tomonidan qo'shib berilgan daqiqalarda hal bo'lgan. Aniqrog'i, Azamat Bobojonovning super goli mezbonlarni tiz cho'ktirgandi.

Imkonsiz vazifa

Vadim Abramovga Samarqand jamoasini Superligada olib qolish topshirilgan. Agar Karlenovich o'z shogirdlari ishlayotgan sobiq jamoasini enga olmasa, "Dinamo"ga keyinchalik Tom Kruz ham yordam berolmaydi. Garchi uning qarshisida tarixdagi eng kuchsiz "Bunyodkor" turgan bo'lsa ham, hech qaysi murabbiy poytaxt klubini Samarqandda engolmaganini unutmasligimiz kerak (11 o'yinda 2 durang).

Xullas, Abramovning oldida shu kungacha hech kim bajarolmagan vazifa turibdi. Nima deb o'ylaysiz, Karlenovich uddalaydimi?

Muallifning telegramdagi kanali → FA| futbol ANALIZI

Superliga. Abramov uchun uddalanmagan "missiya"