Фақат 3 очко!

Ҳар 2 жамоа ғалаба илинжида майдонга чиқади. Охирги 9 турда 1 очко билан кифояланган Самарқанд клуби элитада қолишни истаса, "қалдирғочлар"нинг "қанотини қайриши" керак. "Бунёдкор"даги вазият ҳам бошқача эмас. Сўнгги 11 ўйиннинг фақат 1 тасини ғалаба билан якунлаган тошкентликлар шу ҳафта кубокни ҳам тарк этишди. Ҳозирги вазиятда мухлислар ва раҳбариятни тинчлантириш учун ҳам ютуқ керак. Шу туфайли кураш ҳакамнинг якуний ҳуштаги чалингунига қадар давом этса керак.

Норсафаров қайтди

12-тур доирасидаги "Олимпик" 1:0 АГМК ўйинидан кейин дисквалификация қилинган Фирдавс Норсафаров ушбу ўйин орқали Суперлигага қайтяпти. "Бунёдкор" бу йил қаршилик рефери ишлаган 2 ўйинда 1 очко билан чекланган эди:

8-тур. "Бунёдкор" 1:1 "Металлург"
11-тур. "Сурхон" 1:0 "Бунёдкор"

28 ёшли арбитр "Динамо" иштирокидаги учрашувда сўнгги бор 2020 йилда ишлаган, ўшанда самарқандликлар "Нефтчи" устидан зафар қучишганди (2:0).

Тўқнашувлар тарихи

Статистикадаги мутлақ устунлик "Бунёдкор" томонида. Тошкент клуби "Динамо"га қарши 23 ўйиннинг 19 тасини ўз фойдасига ҳал қилган, 3 та баҳсда кучлар тенг келган. Самарқандликларнинг ягона ғалабаси эса 2014 йилга тўғри келади. "Жар" стадионида ўтган учрашув тақдири ҳакам томонидан қўшиб берилган дақиқаларда ҳал бўлган. Аниқроғи, Азамат Бобожоновнинг супер голи мезбонларни тиз чўктирганди.

Имконсиз вазифа

Вадим Абрамовга Самарқанд жамоасини Суперлигада олиб қолиш топширилган. Агар Карленович ўз шогирдлари ишлаётган собиқ жамоасини енга олмаса, "Динамо"га кейинчалик Том Круз ҳам ёрдам беролмайди. Гарчи унинг қаршисида тарихдаги энг кучсиз "Бунёдкор" турган бўлса ҳам, ҳеч қайси мураббий пойтахт клубини Самарқандда енголмаганини унутмаслигимиз керак (11 ўйинда 2 дуранг).

Хуллас, Абрамовнинг олдида шу кунгача ҳеч ким бажаролмаган вазифа турибди. Нима деб ўйлайсиз, Карленович уддалайдими?

Муаллифнинг телеграмдаги канали → ФА| футбол АНАЛИЗИ

Суперлига. Абрамов учун уддаланмаган "миссия"