Ushbu uchrashuvga har ikki jamoa ikki xil kayfiyatda tashrif buyuradi. Sababi, 5-tur doirasida “Andijon” vodiyda vohaning “Nasaf” jamoasi darvozasini 3 marotaba ishg'ol etib, g'alaba qozongan bo'lsa, “Surxon” jamoasi vodiyda “Navbahor” jamoasidan uchta gol o'tkazib yuborib, Termizga quruq qo'l bilan qaytib ketdi.

Quyida jamoalarning milliy chempionatlarimizda o'tkazgan o'zaro uchrashuvlari statistikasini etiboringizga havola etamiz.

Jamoalar shu kungacha o'zaro 24 marta uchrashgan. O'tkazilgan 24 ta bahsning 14 tasida “Andijon” g'alaba qozongan bo'lsa, 6 ta bahs termizliklar foydasiga hal bo'lgan. Qolgan 4 ta uchrashuvda esa tomonlar murosa ko'chasini tanlashgan.

“Andijon” jami bo'lib raqiblar darvozasini 54 marta aniq nishonga olgan bo'lsa, “Surxon” jamoasi 32 ta gol bilan javob qaytargan.

“Andijon” raqibini eng yirik – 5:0 hisobida mag'lubiyatga uchratgan. “Surxon” esa bir marotaba ham yirik hisobda g'olib bo'lolmagan.

“Andijon” jamoasi jami o'zaro uchrashuvlarda 46, “Surxon” esa 22 ochko jamg'argan.

Ushbu jamoalarning Oliy ligadagi so'nggi uchrashuvi so'nggi marotaba 2004 yilning 14 avgust kuni Andijon shahrida o'tkazilgan va unda "Andijon"ning qo'li baland kelgan – 2:1. Oradan 15 yil o'tib, ushbu jamoalar 27 aprel kuni Termizda bahs olib borishadi.

“Surxon” – “Andijon”. Prevyu