Championat.asia sayti talqiniga ko'ra, 23-turning eng yaxshi darvozaboni – Botirali Ergashev ("Neftchi")

"Neftchi" bu tur Jizzaxda "So'g'diyona" bilan bellashdi va safardan 1:0 hisobidagi g'alabaga erishdi. Terma jamoamiz azosi o'yin davomida 7 marta raqib zarbalarini qaytarishga erishdi va o'z darvozasi daxlsizligini saqlab qoldi. Championat.asia xodimlari muhokamalardan so'ng Botirali Ergashevni 23-turining eng yaxshi darvozaboni deb topdi.

Championat.asia sayti talqinida 23-turning eng yaxshi murabbiyi – Maksim Shackix ("Andijon")

Maksim Shackix bosh murabbiyligidagi "Andijon" ushbu tur o'z uyida Mirjalol Qosimov boshchiligidagi OKMKni qabul qildi va 1:0 hisobida g'alabaga erishdi. Qosimov bunga qadar murabbiy sifatida "Andijon" bilan 21 marta to'qnash kelgan va umuman yutqazmagandi. Shackix boshchiligidagi andijonliklar nihoyat bu ananaga barham bera olishdi. Shu tariqa, "Andijon" ustozi 23-turning eng yaxshi murabbiyi deya etirof etidi.

Championat.asia sayti talqiniga ko'ra, 23-turning eng yaxshi futbolchisi – Anvar Hojimirzaev ("Dinamo")

"Dinamo" bu tur Samarqandda "Sho'rtan"ni 2:0 hisobida taslim qildi va chempionlik uchun kurashni davom ettirdi. Bu uchrashuvda "Dinamo" etakchisi Anvar Hojimirzaev hisobni ochdi va bahs davomida faol harakat qildi. Shu bois, Anvar Hojimirzaev Championat.asia ijodkorlari tomonidan tur futbolchisi nomiga loyiq ko'rildi.

Championat.asia sayti talqinida 23-turning eng chiroyli goli muallifi – Amir To'raqulov ("Bunyodkor")

"Bunyodkor" Qo'qonda "Qo'qon-1912" mehmoni bo'ldi va 2:2 hisobida durang o'ynadi. Bahsning 40-daqiqasida mehmonlar yarim himoyachisi Amir To'raqulov jarima maydoni tashqarisidan kuchli zarba bilan gol urdi. Aynan shu gol Championat.asia talqinida turdagi eng chiroylisi deb topildi.

Terma jamoa darvozaboni, Qosimovni yutgan murabbiy, 21 yoshli futbolchi - Superligada 23-turning eng yaxshilari