"Jamoamizda omadsiz seriya davom etayotgan edi. Shu sababli o'yin boshida raqibimiz o'yinni nazorat qildi va gol ham urishdi, ammo ikkinchi bo'limda biz ikkita gol urdik. O'yin so'ngida esa "Dinamo" futbolchisining individual mahorat tufayli gol o'tkazib yubordik va durang qayd etdik. Mag'lubiyatlar seriyasidan so'ng qayd etilgan durangni yaxshi natija deb hisoblayman. Futbolchilarimdan minnatdorman", - deya fikr bildirdi Ulug'bek Bakaev bugungi bahs haqida.

- "Paxtakor"ga qarshi o'yindan so'ng bir nechta rotaciya ro'y berdi. Ushbu o'zgarishlar bugun qanchalik ish berdi deb o'ylaysiz? "Paxtakor"dan 6ta gol o'tkazib yuborilgani uchun asosiy futbolchilarni zaxiraga joyladingizmi?

- Bunga sababi kimdir yaxshi yoki yomon o'ynaganidan emas. Jamoaning ruhiy holati yaxshi emas edi. Sportchilarda bunday holat uchrab turadi. Masalan, mashg'ulotlarimizni kuzatgansiz futbolchilar qay darajada mahoratli ekanligini bilib olasiz, ammo maydonda esa boshqacha holat. Futbolda psixologiya katta rol o'ynaydi. Biz shu sababli rotaciyaga qo'l urdik. Misol uchun, "Paxtakor" o'tgan uchrashuvdagi har bir zarbasi golga aylanib ketaverdi. Xuddi ertaklardagidek. Bugun ham ikkita gol o'tkazdik, ammo ikkita gol ham ura oldik. G'alaba ushlab qola olmaganimiz alamli, biroq bu futbol.

- Bugun asli himoyachi Franke Ikich o'ziga xos bo'lmagan poziciyada harakatlandi. Bunga sabab nima bo'ldi?

- Biz 0:1 hisobida mag'lub bo'layotganimizda hujumga o'ta boshladik va barcha futbolchilar oldinga o'tishi kerak edi. Ikich esa to'plarga egalik qilishi talab qilinar edi. Biz ikkita standart vaziyatdan keyingi to'plardan gol urib ketdik.

- Bugun Otabek Boymurodov maydonga tushdi. Uning o'yiniga qanday baho berasiz?

- Darvozabon uzoq vaqt o'yin amaliyotiga ega bo'lmaganidan so'ng o'yin tempini his qilishga qiynaladi. Bugun Boymurodov yomon o'ynadi demayman. Otabek birinchi golni bartaraf etishi mumkin edi, agarda ko'proq o'yin amaliyotiga ega bo'lganida. Unga etirozim yo'q.

- Ikkinchi bo'limda changli shamol boshlanib ketdi. Ushbu ob-havo futbol o'ynashni qanchalik qiyinlashtirib yubordi?

- Ob-havo o'zgarishi "Dinamo"ga ustunlik berdi deb hisoblayman. Sababi shamol biz tomonga esa boshladi. Bu esa noqulaylik tug'diradi, lekin shunga qaramay ikkita gol urishga muvofiq bo'ldik.

Ulug'bek Bakaev: "Mag'lubiyatli seriyadan so'ng qayd etilgan durangni yaxshi natija deb hisoblayman"